Horticulture Department Lunglei Division buatsaihin Zirtawpni khan Centre of Excellence for Fruits, Lunglei bul Saichhoh hmunah Lunglei district chhunga huan neitute bakah department atanga master trainer-te tan organic hmanga leitha siam leh thlai damdawi hman dan zir a ni.
He hun kaihruaitu Lunglei DHO L. Lalhmingmawia Pachuau chuan Haulawnga awm CoE for Fruits hi hmarchhak state-ah a awmchhun a ni tih sawiin, he Centre behchhan hian loneituten hamthatna leh hmasawnna tam tak an hmu chho mek tih a sawi a. Mi tam zawk training pek an duh laiin, Covid-19 leng vangin bituk neih a ngai tih a sawi.
Agrico Innovation, Clover Organic Pvt. Ltd. atangin mithiamten Naturevel-SW hmanga leitha siam dan leh thlai thanlenna atana organic damdawi tui Naturevel-AG hman dan an zirtir a, Naturevel SW leh AG te hian lei a siamtha a, thlai a ti hriselin a tithangchak a, thlai hrikin a beih tur laka a ven bakah tharchhuah thlengin a tipung thin tih an sawi. Hemi hnu hian lei tha siam dan dik practical-a inzirtir a ni bawk.
