By MC. Lalthianghlima
Ni 21. 2. 2023 (Thawhlehni) Mizoram assembly budget session ah, kan Chief Minister Pu Zoramthanga chuan “India ram state zingah Sikkim-in cheng Vbc. 12,982 bâin, an ba tlêm ber. Leibâ tlêm ber dawttu kan ni a, cheng Vbc. 12,991 kan bâ. Sikkim nên kan inzah thuak. State dangte pawh en ila, keini âiin an ba tam vek,” a ti a.
A sawi zêlnaah Chief Minister (Finance changtu) Pu Zoramthanga chuan, “Leibâ hi hmân atangin kum tin a kal chho reng a, state zawng zawng kal dan a ni. CHUTI LUTUKIN KA ENGTO LO” tih thu a sawi bawk a nih kha.
Kan state leibâ hi sawi nêp theih emaw, sawi tlêm theih pawh a ni hek lo, kan state leibâ leh mi state leibâ khaikhin chuan, a ba tlêm berte zing ami pawh kan ni mahna, amaherawh chu mi state leh kan state len dan (inthlauh dan) han khaikhinin kan leibâ hi a tlêm lo a ni, thawh chhuah lah kan nei tlêm êm êm a bawk. Mizoram mipui nâwlpui ni tin khawsak phung han en lahin, mirethei ni tin eichawpa buai hi a tam zawk kan ni a, thingtlang lam khawsak phung hre phâk tan phei chuan kan khawngaihthlak lutuk, thawh chhuah innghahna tlâk sawi tham kan nei lo takzet a ni. Chutih laia, kan chief minister (Finance changtu) berin kan leibâ “Chuti lutukin ka engto lo” a han ti mai hi, ram a vei loh thlakin a manganthlak viau a ni. A lehlam takah chuan zêp hauh lova, kan state leibâ a engto tehchiam loh thu a rawn sawi hi a fakawm letling phian, engto lutuk si lova, engto lutuk anga insawi a lemchan âi chuan a rilru dik tak, kan state leibâ chuti lutuka a engto loh thu a rawn sawi kha thu dik tak a sawi a ni.
Heti hian ngaihtuah ta ila, entirna’n: Bank-ah Khuma’n cheng 5,00,000, Hlira’n cheng 3,00,000, Lala’n cheng 80,000 an bâ a, anni pathumte hi chu khaw khat pa awmthei, sorkar zêm zente an ni a. Chutih laiin Hminga’n chheng 70,000 bank-ah a ba ve bawk a, ani erawh ni tina eichawp dap, nupui fanau chhangche tak châwm a ni bawk, sum hnâr innghahna sawi tur a nei lova, chuti chung chuan “Ka leibâ hi, chuti lutukin ka engto lo, a ba tlêm ber Lala dawttu chiah ka ni,” tiin a dinhmun pachhiatzia ngaihtuah hauh lovin han ti ta sela, a nupui fanaute tân chhuan B.P sâng neihna tham khawpa lungngaihna tham a ni ngei ang.
Mi bat tam avanga Hminga’n a leiba a engto lo ve ringawt ang khi thlamuanpui chi a ni lo, thlamuanna kebai a ni. An chhungkaw eizawnna leh an intodelh lohzia enin Hminga leiba cheng 70,000 khi an chhungkaw tân chuan a tam lutuk, sawi nêp theih a ni lo. Hminga nupui fanaute chuan “Kan leibâ engto tur Pa kan va mamawh êm” an ti vawng vawngin a rinawm. Hminga leh kan chief minister erawh class khata awm an ni tlat bawk si.
Vawiina Mizoram state-in kan leibâ cheng Vbc. 12,991 hi, a changtu Finance Minister (Chief Minister ni bawk) tân mai ni lo, ram hruaitu dangte leh mipui zinga a hawiharh deuh îk tân chuan phurh tham lawih a nih lai a, kan chief minister (Finance changtu) berin “Chuti lutukin ka engto lo” min han tih san mai hi, a mak a “Engtia awm thei nge mihringah” tih mai a awl a nih hi. Chuvangin kan leibâ (Kan state len dan ena tlêm lo tak) hi ENGTO tham a tling takmeuh meuhva, chuvangin Mizo mipuite hian LEIBÀ ENGTO TUR CHIEF MINISTER KAN MAMAWH takzet a ni.
LEIBÁ ENGTO TUR CHIEF MINISTER KAN MAMAWH
![](https://theaizawlpost.org/wp-content/uploads/tap_logo-min-large.jpg)