Lei kan ba tam lutuk, kan chuti kan khati tih te, India rama state dangte pawhin lei an ba ten tun, tih te chu tun laia kan buaipui ber niin a lang.
Budget session kan en a, zawhna leh chhanna hun a ni emaw, Bill sawihona a ni emaw, Resolution sawihona a ni emaw, budget general discussion a ni emaw, election campaign rilru pu ranin duhthawh takin Member-ten thu an sawi ti ila kan sawi sual tam lutuk awm lo ve.
Lei kan bat tam leh hmasawnna kan sengluh hi a inbuk tawk a nih chuan, leibat pawh a phurawm viau awm e. Hetih lai hian, tuna kan dinhmun hi han en chiang ila, lei kan bat tam chhan hi, ‘chumi hmasawnna chu kan din’ tih emaw, ‘kuthnathawktuten thawhchhuah tam zawk an neih theihna turin sum chuti zat chu kan puk a, hei an thawk chhuak thur thur alawm’ tia ram tana rotling ‘Asset’ han kawh chat chat tur hi kan nei kum tin lem si lo niin a lang.
Hei hi tun ministry hun chauha thil thleng ni lovin, UT kan nih atanga State puitling kan chuankai hnu leh, chumi atanga tun hun thlenga kan dinhmun a ni chho ngar ngar. Hei hi a chian em emna chu, state dangin innghahna bera ‘agriculture product’ an hman theih laiin, keini innghahna erawh ‘state dangte product’ a la ni tlat reng si a nih hi.
Kan thenawm lawk Tripura sawrkar nikum budget kan en chuan, budget speech hmahruaiah, ‘loneitu singnga chuang tan cheng vaibelchhe 192 sen niin buh MT 104 tharchhuah a ni, tih te a lang thei a. Hetiang lam hawi hi kan sawrkar budget-ah hian tunhma atang tawhin hmuh tur a awm ve ngai lo.
Heti chung hian kan sumhnar lian ber, tax devolution chhutchhuahna (criteria)-a a lawk ber chu ‘state income atanga 45%’ tih a ni a. (A dang 55% te hi —demographic performance-12.5%; population & area-15%+15%; forest and ecology-10%; tax and fiscal efforts- 2.5%) State income hi a san loh chuan tax devolution atangin kan sawk chhuak tam ve thei ngai dawn lo tih a lang a. Kan leibat tam chhan hi thawh chhuah tamna tur te tal ni thei se a duhawm hle a ni.
State dangte pawhin lei an bat tam ve tho avanga ngaihtha tur kan ni lo va, lei kan bat tam chhan hi kan state asset heng – ei leh bara intodelhna tur te, zirna lama hmasawnna te, hriselna lama hmasawnnate leh mipui khawsak phung chawikanna kawnga hmasawnna ngelnghet neih phahna turte a nih chuan, leibat hi a ngaihthatthlak dawn a ni. Kan dinhmun han en hi chuan, leiba tam theuh theuh, state dangte leibat tam dan hi a lo awhawm viau mai lo maw? tih hi zawhna pawimawh tak a ni awm e.
Leibat chhan …
