Daily Newspaper

Leimin vangin khaw 30 chuang kalpawh theih loh

17

Mizoram hmar lam, Khawruhlian leh Hmunnghak khaw inkara leimin nasa tak avangin khaw 30 chuang chu kalpawh theih lohin a awm mek a. Chalfilh bialtu MLA, Assembly speaker Lalrinliana Sailo chuan a bial chhunga heng leimin thlenna te hi Nilaini khan a enfiah.

Khawruhlian khaw hnuaiah hian National Highway No. 150 cheithat leh tihzauhna turin kum 2018 atang khan kawngpui laih tan a ni a, hei hian Khawruhlian khaw innghahna leilung a khawih che viau niin a lang. Hmun hrang hrangah leimin leh lei tlahniam a siam zui a ni. Furpui thlen apiangin harsatna an tawk kumtin ta a, tunkar Thawhlehni khawvar hmaa ruahsurah khan hmun hrang hrangah lei a min a, Khawruhlian thlen hma hmun thenkhata leimin chu lirthei kaltlang theiha tihfai nghal a ni. Khawruhlian leh Hmunnghak inkara leimin erawh thenfai rual lohin a nasa a, kawngpui hi a pumpui deuhthaw a bal nia sawi a ni.

NH 150 kawng thar laih mek hi peihfel a la nih loh bakah hmun hrang hrangah leiminin a hnawh nasa a. Khawruhlian leh Hmunnghak inkalpawhna kawngpui, kawng hlui zawk a chim tak avang hian hmar lam khaw 30 chuang chu kalpawh theih a ni lo a ni. He kawngpui hi Mizoram atanga Manipur kalpawhna kawng pakhatah hman thin a ni a. Ruahman ang chuan tuna kawng thar laih mek siam zawh a nih hunah chuan Act East Policy hnuaiah Kaladan Multi-Modal Transit Transport Project-a kawngpui sial mek hi a pawh dawn a ni.

Khawruhlian khaw hnuaia NH 150 laih mek pawh tur hian Khawruhlian khaw hmun laili tak atangin kawng thar (diversion) laih tumin ruahman a ni bawk a. Hemi atana state PWD leh khaw mipuiten hma an lak dan leh harsatna an tawh mek dante bialtu MLA hnenah hian an thlen a ni.

Speaker Lalrinliana Sailo hi PWD CE Highway Lalruatkima leh SE C. Lalchhuana, Addl. DC Aizawl R.Vanrengpuia leh official dang ten an tawiawm a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy