Site icon The Aizawl Post

Leitan – Sihphir kawng zauh dawn

Durtlang Leitan to Sihphir inkar kawng km. 10.25 a thui zauh leh siamthat hna thawh tanna (work commencement) pualin Inrinni khan chief minister Zoramthanga’n lungphun a hawng.
He kawng siam hna hi Central Road Infrastructure Fund (CRIF) atanga sum hmuh hmanga thawh tur – Widening and Improvement of Aizawl- Durtlang- Lungdai- Kawnpui Road Project-a section pakhat a ni.
Helai kawng zauh project nawr chhuak tura kawng a khirhkhan thu leh tuna hna thawh tan a ni dawn ta chu lawmawm a tih thu chief minister hian a sawi a. National highway anga compensation component dah a nih ve loh avanga he kawng zauhna atana sawrkar ram bak ram lak hek ngai chu compensation inpek theih a nih loh thu a sawi. Hei vang hian sawifel ngai a awm thu te, ram neitute leh khawtlang hruaitute leh tlawmngai pawlte thawk hoa theihtawp chhuaha he kawng hi tha taka kalpui a nih theihna’n inhawng taka theihtawp chhuah tlan a ngaih thu te a sawi a ni.
Mizoramin hmasawnna ruhrel lian, a bikin intlawhpawhna lama hmasawnna a hmuh chhoh dan chu lawmawm a tih thu Zoramthanga hian sawiin, “Hmanlai hun atanga thlira huphurhawm taka ngaih, rel kawng, kawngpui zau tha leh inkalpawhna dangte chu vawiinah chuan tangkai taka hmangin siam belh leh hmalak mekte a ni ta zel a. Beiseina nen hmathlir tha tak neiin, tumruhna nena umzui chuan hlawhtlinna a insiam thin a ni,” a ti.
PWD hotute sawi danin, Aizawl- Durtlang- Lungdai- Kawnpui kawng hi Border Road Organization enkawl a ni a. A kawng hi a road geometry – a chhuk chhoh dan, a kual ulh leh len zawngah te duhthu a sam lo hle a. Chuvangin kum 2004 khan Aizawl- Durtlang inkar kawngpui bik hi siamthat a lo ni tawh. Hemi hnu hian Leitan atanga km. 3.180 pawh hi intermediate lane tura laih zauh hna thawh a ni tawh bawk.
Leitan atanga Sihphir khaw tawp thleng, km. 10.250 chu chief minister hmalaknain tunah hian a kawng laih zauh hna, kawng kual ulh leh chho ulh zual leh kawng chhuat siam hnate thawh a ni dawn a. Hemi atan hian CRIF atangin cheng vaibelchhe 46.57 hmuh a ni. He kawng enkawl hmasatu BRO hnen atang hian PWD kuta hlanchhawn phawt a tul a, hei hian hun a duh rei deuh avangin duh angin a hna hi tan hma thei lo a. Ministry of Defense atanga phalna hmuh hma chu BRO-in No Objection Certificate an pe theilo a ni. Sawrkar laipui lamah state sawrkar hotuten bawhzuiin chief minister-in Union Minister of Defense a hmuh hnu ah NOC hi pek a ni. Sum hmuhna CRIF scheme hnuaiah hian compensation inpekna tur sum dah tel a nih ngai loh avangin duh ang taka hna thawh theihna turin kawngkama huan lo ram neitute phalnaah thui tak a innghat a. Kawng tha neihna tura inhawng zau leh phal zau turin ram neitute ngen an ni.
Kawng siam hna hi SLT Infracon Pvt Ltd. kuta pek a ni a, thla 18 chhunga zawh tura tih a ni.

Exit mobile version