Daily Newspaper

Leng khua in ambulance leh khualbuk nei thar

8

Hrangturzo bialtu MLA, minister Lalchamliana chuan a bial chhung khua, Khawlailung daia Ralkahkawn Bazar te, Leng khuaa khualbuk leh ambulance te a hawng.

Leng a panna kawngah Lalchamliana hian Khawlailung dai, Ralkahkawna Rurban sum leh MLA Fund hmanga sak Ralkahkawn Bazar a hawng a. Chhungkaw 10 velin kumtluana eizawn nana an hman theih tur market building thar an nei chu a lawmpui hle tih a hrilh. Khawlailung tana sawrkarin hmasawnna tur hmalakna a neih thenkhatte sawiin, Rurban atang vek hian tuizem leh fu chingtute tan fu herna khawl pawh ngaihtuah mek a ni, a ti. Rurban sum nuai 4.70 leh bialtu MLA fund Rs. 50000 hmanga sak a ni tih a sawi.

Hemi hnu hian Lengah khawtlangin an lei ambulance thar leh khawtlangin an din Leng khualbuk a hawng a. Minister chuan sawrkar tanpuina ngawta innghat loa khawtlang mipuite inpekna rah duhawm tak hawn a ni chu chhuanawm a tih thu a sawi. Ambulance thar chu Leng khua tan chauh nilo, thenawm khuate tana hman theih tura an duan a beisei thu sawiin, khualbuk pawh Leng tlawhtute tan a tangkai hle dawn a ni, a ti.
Sawrkar kum thar atangin BADP chu Lengah kalpui leh a nih tur thu a sawi a. Rurban atangin tuizem pawh chhungkaw 70 an pek thuai tur thu a sawi bawk.

Leng VCP B. Vanlalfinga’n ambulance leh khualbuk an neih dan sawiin, ambulance leina sum zaa 60 chu Automobile Dealer Association of Mizoram (ADAM) in corporate social responsibility (CSR) fund hmanga an thawh niin a dang zaa 40 chu vantlang ram Jio company-in tower dah nana an luahhawh man tlingkhawmte, State Finance Commission Grant, VC-in an thawh ve atanga an hlawh hmanga an tum a ni. Khualbuk chu an bialtu MLA D. Thangliana a nih laia a fund nuai 2-a bul a tan tawh, chumi sum chuan a hmun turte puahchah niin, SIRD-in Panchayati Learning Centre-a a thlan zara sum a pek nuai 5 te, VC-in sum a dapkhawm leh mi tlawmngaite thilpek hmangtein an sa a ni. “Heng zawng zawng a puitlin chhan chu khawtlang mipui lungrual taka kan thawh ho vang a ni,” a ti.

Ambulance chu Leng khua chauh ni lo khaw thenawmte tan pawha hman theih tura ruahman a nih tur thu VCP hian a sawi a, a hman man tur erawh an la bithliah fel loh thu a sawi. Khualbuk hi a ruala mi 7 thlen theihna niin pindan pahnih chu riah man Rs.400 a ni a, a dang chu Rs. 200 an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy