Daily Newspaper

Lengpui Airport-a kang thelhna hmanrua enchhin

28

Airport Authority of India-in Lengpui Airport-a kang thelhna tur hmanraw thar a pek chu Thawhlehni khan thuthar thehdarthute hmaah phochhuakin a chetvel dan tur chan chhin tir an ni.

AAI-in Lengpui Airport-a hman tura kang thelh lirthei a dah thar hi pathum a ni a. Austrian company Rosenbauer siam niin, ‘Rosenbauer Panther’ tih an ni. A rawng sen leh eng niin, a sen hi pakhat cheng vaibelchhe 3.5 vel a ni a, rawng eng hi cheng vbch. 4.3 vel niin, tunlai thiamna hrang hranga thuam, tui leh kangthelhna atana hman ‘foam’ te pawh joystick anga a control-na siam hmanga kahchhuah leh her tir theih vek a ni.

AAI hotute sawi danin, tumhmuna thlawhna chesualah kangmei chhuak a awmin pilot ten rang takin Air Traffic Control Room an hriattir anga, an ni hian Airport Fire Sevice-te chechhuak turin an hrilh ve leh nghal ang. Fire Service team hi hrilh an nih atanga minute 2-3 chhungin chetsualna hmun hi thleng hman ngei ngei tura ngaih an ni. Zawnchawp ngaiin an awm tur a ni loa, chechhuak hman lo leh an awm chuan ‘thubuai awrh theihna khawp pawikhawihna’ a tling tih an sawi.

An kangthelhna motor thar hi seconds 34 chhungin 0-80 km a thleng hman a, lirthei rih zawng hi a thuam famkim nen tonne 36 niin darkar khatah km.115 a chaka tlan thei a ni. Minute khata tui emaw foam emaw a phuhchhuah hi litres 4750 a tling a, tui litres sing khat a pai thei. A phuh thui theih zawng hi metre 90 tih a ni naa, an enchhin tawhnaah metre 100 a phuh pha a ni.

Tumhmuna thlawhna ke a chhiat avanga runway-a thlawhna a tleng chuan tek (spark) a siam anga, chu chuan kangmei a siam leh thei. A tek veng turin he kangthelh motor hian runway-ah foam a phuhchhuak thei a, kangmeiin kangthelh motor a mankai loha, amah a lo inven ve na atan a ke hma zawnah tui/foam hi a phuhchhuak ve thei bawk. Tui/ foam phuhchhuahna hi a khawi zawng pawha inher kual thei a ni.

AAI hotute chuan kangthelh motor leh a hmanruaah chuan hmarchhak airport zingah Lengpui Airport chu a nei tha ber zing ami a ni tih an sawi.

Kangthelh motor bakah thlawhna chesuala chuangte chhanchhuah dan pawh entir chhin a ni a, Fire Service team bakah medical team leh security team te tih tur leh chet dan tur entir a ni.

He hun hmanpuitu Civil Aviation principal consultant Wg.Cdr. Pu J Lalhmingliana chuan Airport Authority of India Act hman mekah AAI-in a tum ngei ngei tur zingah safety service hi a tel a, chumi hnuaiah chuan he kangthelh motor pawh hi AAI hian a rawn dah tih a sawi. “Min duhsak bik vang pawh ni loin AAI in a tum tur a nih avanga rawn tih a ni,” a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy