Lengpui Airport chungchangah duhthlan tur pathum

Lengpui Airport chungchangah duhthlan tur pathum
Budget Session neih mekah chief minister Lalduhoma’n Lengpui Airport chungchangah duhthlan tur (option) pathum a sawi a, a enkawl zel dan turah rawtna pathum a sawi.
Zirtawpni, February ni 21 khan Tuirial bialtu K Laldawngliana resolution putluh ‘Mizoram sorkarin Lengpui Airport, Indian Air Force kuta hlan/hralh tuma hma a lak mek hi tha ka ti lo a, titawp rawh se’ tih an sawiho a, chief minister hian house leader a nihnaa a hmawr a bawknaah duhthlan tur pathum hi a sawi a ni.
Sum nei ila, tu hnenah mah hlan lo ila tih te, Airport Authority of India (AAI) dawr tha leh turin kan la inhawng tih leh, Indian Air Force nen kan indawr leh ang tih te, hetiang hian a hmasak dan indawta kal a theih thuin a hmawr a bawk a ni.
Resolution puluttu K Laldawngliana Lengpui Airport chu Laldenga’n nasa taka a nawr, Lal Thanhawla huna lo puitling ta tiin a sawi a, sorkar lo awm tawhte’n harsa chung pawhin an lo enkawl thin tih sawiin, sorkar ding laiin dodalna karah a ruk a rala hmalain Indian Air Force (IAF) kuta hlan a tum niin a sawi.
Leader of opposition Lalchhandama Ralte, Tuivawl bialtu chuan ZPM sorkar hnua cabinet meeting hmasa ber, December ni 13, 2023-a thukhawmte’n AAI kuta Lengpui Aiport hlan chungchang ngaihtuah turin working committee an din a, chu committee chuan IAF hnena hlan lam an ngaihtuah ta daih niin a sawi.
Ruling member-te’n Lengpui Airport hralh a ni dawn lo tia an sawi chu chief minister lakah no confidence an pulut tluk a ni tiin a sawi a, chief minister hian TV interview-ah IAF hnena hralh a nih tur thu a sawi, a ti.
House leader Lalduhoma’n MNF sorkarin 2004-ah khan AAI kuta hlan tumin hma an lo la tawh tiin a sawi a, AAI lamin MoU an duan chu MNF sorkarin a pawm lo a, 2015-ah Congress sorkarin IAF kuta hlan a tum niin a sawi bawk.
Kan thalaite duhkhawp tur khawpa airport enkawl hi Mizoram sorkar tan a har a, kawng dang kan dap a ni tiin a sawi.
AAI-in Mizoram sorkar lehkha an chhang duh lo a, an phone pawh an la duh lo nia sawiin, Indian Air Force chu an lo hlauhawm lem loh tia sawiin, Zoram Kalsiam, Zonet-a Indian Air Force-a thawk thinte kawmna lo thlir theuh turin mipui a ngen.