Lengpui Airport tumkawng
siam mek a tha tawkah ngai
Chief minister leh PWD minister hriatpuina in Thawhlehni zan khan Lengpui Airport tumkawng siamthat mek chu MLA pathum – deputy speaker Lalfamkima, adviser to CM (Technical) Er H Ginzalala leh T Lalhlimpuia ten an tlawh.
Adviser to CM (Technical) chuan hnathawh tawh leh thawh mek enin a tha thawkhat hle tih a sawi a. Laboratory Testing Room thlengin an luhchilh a, tun dinhmunah sawiselna tur an nei lo, tiin, “Temperature, a chhah zawng, a chak zawng, levelling leh tehna dang pawh a hmunah kan enpui vek a, hna an thawk tha rih hle,” a ti.
Lengpui Airport tumkawng siamthat mek hi SASCI 2025- 2026 Part-I AA hnuaia thawh a ni a, cheng vaibelchhe 91 dah a ni. Hna hi airport runway recarpeting (siamthat) lama sulhnu nei tha tak Brahma Infratech Rajasthan-in a thawk a, chhun lamah hna a thawh theih loh avangin zan khatah a tlangpuiin square metre 2500-2800 an thawk hman thin. Chhun lama thlawhna a tum leh theihna turin zingkarah PWD-in quality test an nei ziah a, chu chu Air Traffic Controller (ATC) in a pawmpui leh a ngai a ni.
Kumin November 10 khan hna tan a ni a, April 2026-ah zawh tum a ni. Lengpui Airport Runway siamthat hnuhnung ber kum 2020 khan 36 PCN-a siam a ni a, tunah hian 50 PCN chunglam ni tura siam niin, thlawhna lian zawk pawh tum thei tura beisei a ni.
Tum danga runway siamthat ang loin, technology sang zawk, German company siam milling machine hmangin 150 mm thickness-in runway pumpui hi mill chhuah vek a ni dawn a, 170 mm-a chhahin a thara siam tur a ni.
Lengpui Airport tumkawng siam mek a tha tawkah ngai
