Lengpui an chak awlsam

MBOCWWB 8th Inter Village / Local Council Football Tournament 2026 chu Thawhlehni khan RG Stadium-ah khelh chhunzawm niin, last 32 khelh zawh a ni a. Vawiin atangin last 16 khelh tan a ni a. Last 32 a inkhel hnuhnung lamah Lengpui chuan awlsam takin tlangnual an hneh a, ast 16 an inhlangkai.
Lengpui hian Thawhlehni khan RG Stadium-ah Tlangnuam an hmachhawn a, Aizawl team lakah an khel tha hle. Football thiam khua ni reng thin Lengpui tan hian Lalnunpuia chuan chawlhlawk dawn hnaih minute 35-naah hmahruaina goal a thun a. Nunpuia goal thun hmang hian 1-0 a hmahruai chungin chawlhlawk an hmang.
Chawlhlawk hnu lamah Lengpui an khel tha chhunzawm a, goal an thun belh leh thuai. Second half tan atanga minute rukna lekah ‘Player of match’ a thlan zui tak Lalrokima chuan an goal hnihna thunin an hmahruaina a tizau a. Si hniha hma an hruai hnuin PC Zaihmingthanga chuan minute 70-naah an goal thumna a thun zui leh a, an chakna a nemnghet. Tlangnuamin an si phurh sut tum viau mah se hun tawp thlengin an si phurh an sut thei lova, Legpui lakah tlawmin last 16 an lut zo lo.
Mutthi an chak
Thawhlehnia inkhel dangah Mutthiin inlehthalna lian an thlentir a, Veng lian leh football thiam veng Chhinga Veng chu 3-1 a hnehin last 16 an inhlangkai.
Mutthi VC team te hian Chhinga Veng lakah bul an tan tha viau a, C Zomuanpuia chuan inkhel tan atanga minute 13-na lekah hmahruaina goal a thun nghal. Team lian lakah hma taka goal an thun vangin an phur a, RG Stadium-ah ngampa leh huangtau zawkin an inlan zui theih phah. Chawlhlawk hmain goal thun belh thei lo mah se chawlhlawk hnu lamah goal hnih ngawt an thun belh leh tlat thung.
1-0 a hmahruai tawh Mutthi tan hia C Lalruatkima chuan minute 52-naah an goal hnihna a thun a. Laltlanhlua chuan minute 68-naah an goal thumna a thun belh zui leh bawk. Chhinga Veng tan hian F Lalnuntluanga chuan minute 74-naah goal thunin an si phurh sut then bawk mah se tlawm an pumpelh zo lova, uiawm takin last 16 an inhlangkai zo lo. He inkhelah hian Mutthi tan goal hmahruai thuntu C Zomuanpuia chu tPlayer of the match’ ah thlan a ni.
Vawiinah last 16 khelh tan a ni dawn a, chawhma dar 11:00 ah Republic leh Venghlui an intum ang a. Chawhnu dar 2:00 ah Ramhlun South leh Saikhamakawn te an intum zui leh dawn bawk. Inkhel hmuhnawm tak a nih ngei a rinawm a, entu pawh an tam rin a ni.