Lengpui Airport hmar lam kilometre khat vela Lengpui ram, Indian Air Force kuta hralh chungchang chuan hun rei tak chanchinthar puanzarna hrang hrang leh social media platform hrang hrang a luah hneh hle a. Political party hrang hrang leh sawrkar aiawhten press conference an inneih chhawk zut a. Ram leinaah hian, sawrkar dan dinglai bawhchhiatna nasa tak a thleng nia a lan avang hian, inpuhmawhna a lo awm a. Sawrkar kal ta leh sawrkar kal mekte chuan hemi chungchang hi CBI chhuitir an duh thu an sawi ve ve a. CBI emaw Enforcement Directorate (ED) emaw te hian han chhui tak tak se, investigation result hi ‘Fifty-Fifty’ (50:50) mai chuan a hmawr bawk a nih a rinawm loh hmel viau a ni.
Lengpui ram IAF hnena hralh chungchang hi senior journalist HC Vanlalruata’n tun hnaia ni tin chanchinbu Vanglainia a rawn phochhuah atanga rawn lar thar leh ta a ni.
A kaihtawi: Kum 2004-ah Aizawl pain Lengpui khaw pa pasarihte ram VC pass 8 a lei a, a hnuah Garden LSC-in a let a, a tíra ram neitute hming vekin Garden LSC hi siam a ni a, ram hralhtute hian hei hi an hre zui tawh lo. Kum 20 hnu-a sorkarin IAF pêk túra he’ng ram a lâk (acquire) pawh hian a tíra ram neitute hming vekin a la awm a, ram neitute hian sum an dawn belh lo. Sorkarin zangnadawmna a pek hian an hming an ziah hnan lo, engmah an hre ve lo. (Lehkha lem. Mi hming hawha sum lakna)
Sorkarin ram a lâk dawnin tualchhung chanchinbu-ah notification chhuah tur tih chu, tihchhuah a ni lo. (Dan palzutna).
Ram laksakna man (rate) siam fel a nih hnuah nikum khan notification tihchhuah a ni a; mahse, mipui/khawtlâng a nghawng dan tur zir chianna (social impact assessment) erawh tih a ni lo. (RFCTLARR Act, 2013 bawhchhiatna).
Thildang dikhlel pawh tam tak a la awm. Tuna a kaihtawi tlem kan han thurchhuah atang ringawt pawh hian, hetiang thil dik lo ti tura thil dik lo dang inhnamhnawih tam dan tur chu a chhuidawn theih mai awm e.
Hemi chungchang hi public-ah phochhuah ni lo ta se, thil dik lo a inzep tûn tih hre ru reng chungin sawrkar hian kaltlangpui a pawiti dawn lo tihna em ni ang? Ram hralh ni lovin, a hawha hawh (lease) turin kan tifel tawh a nih pawhin, a ram neitu Lengpui khawtlang hian air force te hi an ram chhungah inbun an phal dawn lo tih tunhnai khan an rawn auchhuahpui ve leh a; dan palzut chunga thiltih chuan nghawng duhawm lo a nei chho zut mai dawn niin a lang.
Sawrkar langtlang kan ti thin a, a thu chauh niin a lang, a ruka thiltih tum ngar ngar te hi kan iang zo ta! Sum ngainat hi sual tinreng bul a lo ni tih hi a dik viau a ni ang e.
Lengpui ram hralh leh a behbawm…
