Lengpuia Indian Air Force tana ram lei danah sawrkarin CBI hnena chhui phalna a pek chin dan a chiang lo tih Congress party chuan an sawi a. He thilah hian chief minister leh Revenue minister chu mantang an ei ve ngei tih rinhlelhna tur a awm tih an sawi nawn.
MPCC thupuangtu Dr Lallianchhunga chuan, CBI-a FIR an thehluh hi an ngaihven reng a. An ni lam chuan FIR a luh a, an chhui tawh chuan thu haw lam kal lam hi ‘confidential’ a ni tawh a, an hriat tur awm ang chu email emaw phone-in emaw an rawn hrilh zel tur thu in an chhang tih a sawi a. Sawrkar chuan a hming chuan CBI hi ‘consent’ a pe tih thu Assembly House-ah pawh an sawi a, eng ang chinin nge chhui turin phalna a pek tih erawh an chiang bik lo tih a sawi. “Consent pek hi chu step khat chauh a la ni,” a ti.
Lengpui Airport bula ram lak danah hian dan bawhchhiatna nasa tak a awm nia a lan avangin he thil thleng hi an party chuan a ngai thutak hle a. Vawi engemawzat thudik puangzar turin ZPM sawrkar a lo ngen tawh a. Kumin February 5 khan CBI Aizawl Unit hnenah First Information Report (FIR) an thehlut a, heti khawpa ZPM sawrkar an nawr chung hian, ZPM sawrkar hotute zingah a hlawkna tel vetu an awm nge, ZPM sawrkar chu insawifihlim tumin tan a la khawh char char tih a sawi.
IAF-in Lengpuia ram lei an tum chungchangah 2025 February 1 khan chief minister chuan ‘tihtawp lailawk’ (kept in abeyance), a nih thu sawi mah se, hemi hnu lawk hian chak takin file kaltir a ni a. 2025 May 15-ah preliminary notification chhuahin, hemi ni vek hian social impact assessment (SIA) neih ngai lo (exempt) turin Revenue minister-in phalna a pe nghal bawk tih a sawi a ni.
“He ram lak tum chungchangah hian Land Revenue & Settlement secretary chuan fimkhur taka ‘notesheet’ a a ziah chu, chungtlak (override) turin Revenue minister-in 2025 July 18-ah leh chief minister-in 2025 July 21-ah khauh (strong) takin an ziahhnan a. 2025 July 24-ah compensation award an tifel a, a tuk July 25-ah ram leina man chu Pu Rohmingliana kutah Rs. 32,41,94,731 leh Pu Henry Lalremsanga Hlawnmual kutah Rs. 117,90,26,341 pek nghal a ni. August 26-ah Pu Rohmingliana hnenah Rs. 37,58,05,269 pek leh a ni. Hetiang khawpa chaka thil kalpui a nih avang hian chief minister leh Revenue minister hi mantang insemnaah an tel ve ngei ang tih a ti rinhlelhawm zual hle,” Dr Lallianchhunga hian a ti.
IAF tana Lengpuia ram lak a nih danah hian Revenue minister-in Assembly Session-a ziaka chhan chi zawhna a chhanna atangin dan bawhchhiatna a awm tih a sawi a. Section 54 of the Transfer of Property Act 1882-ah ram neitute hnen atanga Pu Rohmingliana’n ram a leina ‘sale deed’ a siam hi ram neitu tak takten an hriatpui loa; compensation claim-na atana a tir atanga a ram neitute hming Pu Rohmingliana’n a la hmang thei ringawt pawh hi thil mak a ni tih a sawi.
Section 17 (1)(b) of the Registration Act 1908 angin, ram inleina document, sale deed chu sawrkarah ziahluh (register) a ni loa, register a nih loh avang hian sawrkarin Rs. 30000 a hloh bawk tih a sawi a. Article 23 (b)(i) of the Schedule to the Indian Stamp (Mizoram Amendment) Act 1996 angin, ram inleina hi dan ang takin tih nise chuan, sawrkarin stamp duty atangin cheng vaibelchhe 5.61 hmu tur a nih lain, dan bawhchhiaa ram inlei a nih avang hian sawrkarin hei hi a hloh tih a sawi. Section 100 of the Mizoram (Land Revenue) Act 2013 angin ram neitu inthlakna reng reng chu Registration Act 1908 hnuaiah inziahluh (register) ngei ngei tur a ni tih a sawi bawk.
“ZPM sawrkar hian sawrkar kalta hunlaia thui tak lo kalpui tawh a ni tih sawi thin mah se, cheng nuai 11790 chuang insem tur a awm tih an hriat hnuah an titawp duh bik lo em ni, tih hi ZPM sawrkar hotute kan zawt a ni,” MPCC thupuangtu hian a ti a. Cheng tam tak diklo taka insemna a awm ngei nia lang chu chhui chhuah a nih ngei theihnan leh a mawhphurtute dan anga hrem an nih ngei theihnan Congress party chuan theihtawp a chhuah zel dawn tih a sawi a ni.
Lengpuia ram inlei dan chhuinaah CBI phalna pek dan hrechiang duh
