LESDE Inter Veng 2025 – Zarkawt Champions
Home – It’s Coming Home!
Mizoram basketball inpui Zarkawtah ngei mai champion nomawi a haw ta!
Kum 2005 atanga khan mumal takin basketball intihsiakna (Inter Branch YMA/Veng/Khua) neih tan a ni a, Mizorama basketball uar chhuaktu Zarkawt veng tan kum 20 zet a inherchhuah hun nghah erawh a ngai thung!
Hei le, champion nomawi ngaih hlut hlawh chu a pianna veng Zarkawtah a haw ta – hun a duh rei hle!
Final inkhel luhchilh nghal ang
Zarkawt champion dal tum Tuikual South veng tan hian hming langsar leh daih rei, kum 20 kal taa TKS tana inlan tan Dina Fanai (the general) a awm a, ani hian final a basket hmasa ber neiin a u fapa Jeptha-an a rawn dawt zui nghal zat – pa leh fapa kan hmu nghal thawt!
1st quarter-ah hian TKS player Dina Fanai leh Jeptha-a khel a hmuhnawm fal nalh a, Faka a hmuhnawm hle bawk. TKS hmahruai fal lutuk tur erawh Matthew Sailo leh chuai thei lo, Rempuia ten chelhin, tha an thawhhlawk hle. Tawnhriat ngah Sangkima tangkai zia chik taka inkhel en chuan an hmuh hmaih awm lo ve! Most Valuable Player (MVP) a thlan zui tak, mi lian zaidam, fit 6’5 zeta sang Matthew Sailo (the gentle giant) in basket rawn nei zuiin, first quarter hi TKS lamin 24 – 15 a la in hma an hruai nghal!
Mual liam ta, TKS phengphe nunnem Pu Mafaka hriatrengna banner intar chuan thenkhat lunglen leh lungno a kai chhuak ngei ang – ani hi TKS player Dodo-a pa a ni!
2nd quarter-ah hian Zarkawt an rawn insiam tha a, point 16 lai an nei thei. Pressure a sang tial tial a, khuang ri dup dup leh fans ring taka au khawk rum rum karah Zarkawt tlangval tuaitir Rema a rawn inlan a, Zolawman 3 points a nei zui a – Zarkawt lam an phur hle.
Rebounds-ah TKS in Zarkawt an ngam lo hle. Zarkawt player Dina a khawngin tharum a ngah a, tum hnih shot block a nei zawn zat zui, a teammate-te tan thlamuanpui tham a ni. Zarkawt 33 – 36 TKS ni in, half time chawlh hman zui a ni.
3rd quarter-ah defense tha zawk leh palian zawk Zarkawt an khel tha zual sawt a, an game thlak hretin an lenna an hmang tangkai a, a chhung (paint area) atangin an nawr na hle a – an chhawr in an hlawhtlinpui!
He quarter pawimawh takah hian TKS captain Faka leh Dodo-a an langsar a; Zarkawt lamah hian Matthew Sailo kiangah an under 23 player Rema leh Ruatkima te ho an langsar hle bawk! He quarter hi a tawp meuh chuan Zarkawtin TKS lakah 51 – 45 in hma an hruai der!
4th quarter tan phat atangin an innawr tawn nghal hle. Tawnhriat ngah Zarkawt player Sangkiman 3 points in bul a tan a, an hmahruaina point 9 in a sawhnghet sauh!
TKS player tha ber Jeptha-a leh Valpuia ten point rawn nei zuiin, Jeptha-a hian MVP he inelnna ah hian nih a phu zia a lantir nawn awn awn.
Zarkawt tan hliam avanga a theihna khel chhuak hlei thei lo, Hnehpuia rawn inlan a, assist vawi khat leh point hnih hlu tak a thawkchhuak nghal!
Hun tawp hnaih lama inlehthalna hun tha a awm laiin, Zarkawt tlangval Dinan a zawnin point a nei a, a team-te hmun himah a hlangkai a – inkhel a zawh meuh chuan Zarkawtin 76 – 70 in TKS an hneh a, Mizorama veng thiam ber an ni zui!
Final-a mimal point nei tam zualte –
Tuikual South
Jeptha – 21 points
Dina – 6 points
Faka – 12 points
DoDo – 10 points
Zarkawt
Laldina – 15 points
Rema – 12 points
Ruatkima – 12 points
Mathew – 10 points