Leverkusen lamah Vazquez a kal
Kumin nipui thawt ruala Real Madrid-a a contract hmang zo Lucas Vazquez chu Bundesliga club Bayer Leverkusen chuan free transfer-in an lalut ta.
Kum 34 mi Vazquez hian Los Blancors tan Champions League trophy panga bakah La Liga title pali ngawt a hawnsak tling tawh a, 2024-25 season-ah pawh Real Madrid tan match 53 zet la khel tling mah se a kum a lo tam ve ta deuh a, Spanish giants chuan inremna thar ziahpui loin an sezawl chhuah ve ta a ni.
Veteran player ni tawh mah se rei a awl thei ta chuang lo a, Erik ten Hag-a team chuan kum hnih chhung atan an senglut a; Vazquez hian Leverkusen a zawm chhan chu Leverkusen manager hlui, tuna Real Madrid boss thar ni ta Xabi Alonso leh a team-mate hlui, 2012-13 season-a Bundesliga club tana lo khel ve tawh Dani Carvajal-te thurawn leh sawipui vang niin a sawi.
Real Madrid academy atanga zir chhuak Vazquez hian kum 2015 khan a first-team debut nghakchhuakin, Bernabeu club tana match 402 a khelh chhung khan Club World Cup trophy pathum telin trophy 20 a lakpui tling.
Rentin daih (versatile player) an tih thin hian Spain tan pawh vawi kua a khel tling a, ram tan hian wing leh right-back lamah a khel thin.
Season liamta khan Vazquez hian Spanish top-flight match 32 la khel tlingin, Liverpool atanga Trent Alexander-Arnold a lo lan takah khan kumin nipui laia khelh Fifa Club World Cup-ah erawh substitute bench atangin vawi hnih a lut pha ta chauh a ni!
Leverkusen hian kumin May thla khan Jeremie Frimpong chu Premier League champion lamah an hralh a, hei vang hian full-back an la dap kal mek a ni.
Season hnih kaltaa domestic league leh cup Double thei German club hian kumin nipui bazar an hawn laiin Florian Wirtz chu Liverpool lamah an kaltir bakah Granit Xhaka pawh Sunderland hnenah an hralh a, defender Jonathan Tah pawhin free transfer-in Leverkusen hmelma lian Bayern Munich a zawm bawk.
Leverkusen lamah Vazquez a kal
