Spanish head coach Xabi Alonso kaihhruaina hnuaia season kal laia tlawm la nei lo Bayer 04 Leverkusen chuan an boss-in a chhuah loh tur thu a nemngheh hnua an match hmasaberah Inrinni khan dinhmun derthawnga ding hmasa zet chungin Hoffenheim lakah 2-1 hnehna an chang leh hram a, German Bundesliga table-a an hmahruaina an sawhnghet leh sauh.
Season kal lai inelna hrang hranga game 38 chhung tlawm lo tling tawh Leverkusen hian an record ropui tak an tawpsan hman teuh hle a, minute 33-a Maximilian Beier-a goal khat tihluh kha mikhual Hoffenheim-in an chakpui thei mai dawna a lan hnu minute hnih chiah awm tawhah Robert Andrich chuan league hmahruaitu team siphurh sutna goal khungin, hun pekbelh minute khatna a kal mek laiin Patrik Schick chuan Alonso team chakna goal a khung zui leh a; Inrinni zan inkhel dangah table-a pahnihna luahtu Bayern Munich an tlawm avangin Leverkusen hian point 13-in hma an hruaifal mek.
Spanish manager Xabi Alonso khan Germany ramah a team vawn lai a chetthatpui bawk a, season tharah hian a club hlui Liverpool emaw German club ropui Bayern Munich emaw enkawl tura sawirik a ni chho reng a, mahse, Hoffenheim an mikhual hma lawk khan a chhuah loh tur thu a tichiang a, rilru hahdam zawk nena khelmual an luh laiin Leverkusen an talbuai a, tlawm thei mai dinhmuna an din hman vuai vuai hnuah ropui takin hnehna an changlet leh thei a ni.
Tarlan tak angin, tun season inelna hrang hranga game 39 an khelh tawhah Leverkusen-in tlawm an la nei lo a, season kal laia game sarih chauh khelh tur awm tawhah an club chanchina a vawikhatna turin league title an hnaih zel.
Bayern Munich 0-2
Borussia Dortmund
Inkhel dangah an mikhual ngampa ngam loin Der Klassiker-ah Bavarians an tlawm a, inkhelh banah Bayern boss Thomas Tuchel chuan an tan title race a tawp fel tih a sawichhuak ta nge nge!
Dortmund goal hmasa zawk hi minute 10-na leka Karim Adeyemi tihluh niin, second half minute 83-ah Julian Ryerson chuan sihnih faia mikhual team chakna goal a thawh ve leh a, August 2019 German Super Cup hnu lama a vawikhatna atan Bayern Munich lakah Borussia Dortmund an chak ve leh ta hram.
An chung chiaha hmahruaitu Bayer Leverkusen nena point 13 zeta an inthlauh hnuah chanchinbumite’n Bayern boss nihna chawlhsan ve tawh tur Tuchel chu title beiseina a la nei em tih an zawt a, an tan beisei tur a awm loh thua chhangin, “Vawiin game hnuah chuan kan tan point chhiarin awmzia a nei tawh lo. Leverkusen ka lawmpui e,” a ti fel et!
Tarlan tawh angin, Leverkusen manager Xabi Alonso chu Tuchel-a kalsan tur Bayern leh a club hlui Liverpool nena sawizawm a ni reng a, mahse, tunhnaiah a club vawn lai a thlah loh tur thu tichiang tawhin, Leverkusen kuta league title hmasaber luhpuitu coach ni tura ngaih a ni nghet deuh deuh.
Spaniard hian game sarih la awmah a team enkawl chu vawithum lek pawh chakpui leh se a zawna Bundesliga title hnuhnung 12 rut fai vektu Bayern Munich kut atangin Leverkusen-in league title an chhuhsak thei tawh dawn a ni.
Leverkusen tan league title hmasaber tur hnai zel
