Daily Newspaper

Lionel Messi-a’n chhuah a dil

14

Barcelona fachuam, naupangte a nih atang duat taka an lo enkawl tawh Lionel Messi chuan club dang pan a duh a, club thuneitute hnenah chhuah dilna hial a thehlut ta. Club dang pantu player hi an chelh zui ngai meuh lova, Messi hian Barca chhuahsan in, chona thar a hmachhawn ngei tura ngaih a ni a, Messi hian titi a siam tam hle.

Thawnthu hlui
Football thiam chungchung ni chunga thang thei lo Lionel Messi hi kum 13 mi lek a nih laiin Spain club lian La Liga hian an la lut a, duat takin an enkawl chho. Kum 2004 atang khan senior team tan a khel tan a, Barcelona senior team tan a season khat hman naah a chetha nghal hle a, champions League-ah an champion nghal hial a ni.

Barcelona tan hian ropui takin a khel a, a lar chak hle a,m khawvela footballer tha ber, Fifa Ballon d’Or chawimawina dawng ngun ber a ni chho ta hial. Barca tan hian inelna hrang hrangah vawi 731 zet a khel a, goal 634 zet a thun a, Barcelona tan goal thun hnem ber a ni. Barcelona hi trophy 34 zet a lakpui a, chung zingah chuan Champions League trophy pali leh La Liga trophy 10 zet a tel. Barca tan hian kum 2012-ah khan a chetha fal hle a, hemi season hian inelna hrang hrangah goal 79 zet a thun tling thei hial. Season 10 chhung zet chu goal 40 chin chunglam a thun tling zawn thei a, hetiang ti thei hmasa ber leh awmchhun a ni. Club pakhat an champions league-a goal thun hnem ber a ni a, Barca tan hian UCL-ah goal 115 zet a thun tling tawh hial a ni.

Barcelona-ah ropui chungchuan takin khel thin mahse season liam ta chhiahah khan a mimalin chetha tho bawk mahse an team an chetha lova, trophy lak an nei lo. La Liga leh Copa del Rey trophy an hloh hnuin champions league-ah an mualpho zui leh a, champion thar Bayern Munich chu 8-2 ngawtin an ngam lo. Bayern Munich laka an mualpho em vang hian Messi hian Nou Camp nuam tihna a nei tawh lova, chona thar hmachhawn turin chhuah a duh zui ta a ni. Manager thar Ronald Koenman chuan chelhzui duh mahse Messi hian chhuah dilna a thehlut ta tho a. Chhuah dil ta na na na chu Barca pawhin dan an tum reng bik lova, manto taka hralh in, an squad thuam chak nan Messi an hralhna sum hi hman tangkai an tum ve ta a ni. Messi hian 2021, May thla thleng contract a la nei a, a lakchhuah theihna zat chu 700m euro zet a ni.

Contract chungchanga inhnialna
Lionel Messi hian kum 2017 khan kum 2021 thleng cham turin contract thar a ziak. He a contract tharah hiana lakchhuah theihna zat tur hi bilh tel thlap a ni. A lakchhuah theihan tur zat bakah hian inremna mak angreng tak an nei tel a, ‘2019-20 season tawp hunah a chhuak duh a nih chuan free transfer in a chhuak thei ang’ tih an ziak tel. Hei hian contract chungchanaga inhnialna a chawkchhuak ta a, Barca hian a lakchhuah theihna zat an siam hi la nungah an ngai a, Messi hian free transfer-a chhuak thei turah a lo inngai ve thung a, court-ah hial kal a duh niin tarlan a ni nghe nghe.

Free transfer-a Messi chhuah theih tur chungchang hi an lo ziak tel ngei mai a, ‘2019-20 season tawp hunah a duh chuan free transfer in a chhuak thei ang’ tih bakah hian a chhuak duh a nih chuan thla khat hma lamah club a hrilh chiang tur a ni’ tih an ziak tel. Chuti a nih chuan Messi tanhmun hi a phet deuh zawka ngaih a ni. Free transfer-a a chhuah theihna hi a hmang tankai duh a nih chuan May thla khan a chhuak dawn tih a hrilh chiang tawh tur a ni a, a hrilh lova, a sawi chiang si lo lai hi Barca tan chhan tha tak a ni.

Hetihlai hian Messi hian Covid 19 hripui leng a chhuanlam tel ve leh thung. June thlaa season zo thin kha hripui vangin khelh zawh theih a ni lova, Ausgust ni 16-ah Bayern Munich laka an tlawm chiah khan an tan season a zo fel ve chiah a, hripuiin a tihbuai vangin thil a mumal thei lo tih chu a tan chhan a ni. Messi tan chhan hi ngaih mai chuan awmang thluam mahse hnialna tha tak a awm leh thung. Covid 19 vanga season pawh sei a ngaih vangin June thlaa contract hmang zo tawhte pawhin short term contract an ziak a, short term contract ziak lova chhuak tawk pawh an awm a, chung zinga langsar tak pakhat chu PSG striker Edinson Cavani a ni. June thlaa contract hmang zo, short term contract ziak leh zingah Manchester City captain David Silva pawh a tel a, UCL-a an tlak chiah khan a contract hmang zovin a zalen zui leh nghal mai bawk.
Hetiang hi thil awmdan a nih vangin Messi hi free transfer chuan a chhuah a rinawm loh a, eng club pawh pan dawn se khawvela player manto ber ni tura lei hrim hrima ngai dawn niin a lang.

Barca an ti lutuk em
Tarlan tawh angin Lionel Messi lakchhuah theihna zata an dah chu 700m euro zet a ni hem mai. Messi hi khawvela football tha ber ang hiala ngaih ni bawk mahse kum 33 mi a ni tawh a, chuai lam pan chak ve tak a ni. Premier League angah phei chuan tha taka season hnih chhawr huphurhawm tawh tur a ni hial a, a lakchhuah theihna zat pangngai hi chuan tu club mahin an lak duh a rinawm loh. Tiang zata lei thei pawh awm se an lei duh a rinawm chuang loh. Barca hian an player te hi an hauh em em a ni ber a, an lakchhuah theihna zat tur sum tam uchuak tak an dah thin. Rawlthar la lar lo tak pawh nise contract thar an ziahpui chuan a lakchhuah theihna zatah 300, Euro te an dah thuai mai a, heti lamah hi chuan an che uchuak mah mah niin a ngaih theih. Heti a nih vang hian Messi hi £200m vel chuan a lak theih mai tura ngaih a ni.

An lawm lo
Lionel Messi chhuah an phalsak mai vangin Barcelona tantute an lawm lo hle a, mi za chuang zette chuan Nou Camp kiangah an lungawi lohna an lantir. Barcelona tantu mi engemawzat zingah Tottenham Jersey ha a lo lang ve teh nawlh a, chu chuan titi a siam tam hle nghe nghe.

Manager thar ni tura an lak luh , an player hlui Ronald Koenman chuan lawm a hlawh hman viau a, Messi a chhuah dawn bakah Luiz Suarez chunga a chet dan vangin sawisel a hlawh zui ta hle thung. Koeman hian Uruguay striker Luiz Suarez hi phone hmanga bia in, Nou Camp a chhuahsan theih thu a hrilh a, a chhuak lo a nih pawhin chhawr zui tumna a neih lem loh thu, thu dengkhawng a hrilh. Suarez hi chhuak ngei tura ngaih a ni a, a kawppuifuh tak Messi a chhuak ngei dawn niin a lang leh ta bawk nen Barca tantute an lawm lo hle a, hma lam pan leh turin rinhlelhna lian tak an nei tel bawk.

Hetihlai hian Ronald Koeman ngei pawh hi Messi chungah a lawm lo ve hle tho thung, Messi dem a, sawiseltu zingah Barca president thar ni mai tura ngaih Toni Freixa chu a langsar per pawl a ni. Freixa hian Messi chu amah duat a, hmangaihtu Barca lakah hawihhawmna leh hmangaihletna pawh nei lo a nih thu a sawi a. Barca zah derna chhete pawh nei lo ang hialin a chhuah.

Messi-a’n chhuah dilna a thehlut tehthut hian Barca tantute a thawng hlawm viau a, sawiseltu pawh an tam hle. Hetihlai hian Barca tana a khelhpui thin Carles Puyol leh Luiz Saurez te chuan Messi thutlukna siam hi an lo thlawp ve hle thung a, an thlawpna hi social media-ah an pholang.

PSG in an ngam huai
Nou Camp atanga Messi chhuak tur anga thuthang awm hian club lian leh ropuite beng a thleng hma hle. Serie A champion Juventus chuan Crisitiano Ronaldo nen inkawp turin lak luh an duh a. Inter Milan pawhin lak an duh bawk. Premier League club lian Manchester City leh Manchester United te pawhin sum tam tak sengin lak luh an huam bawk. He thu buatsaih lai thlenga thawm nei lian ber chu French Ligue 1 champion Paris St Germain an ni thung.

Sportmail in a tarlan danin PSG hian kum 33 mi Messi hi kum khatah £95m zet hlawhtir an huam. Hlawhsang uchuak tak pek an huam a, Messi hian PSG a zawm a nih chuan an player hlawh hnem pahnih Neymar leh Kylian Mbappe te hlawh belhkhawm aia tam a hlawh thei dawn. Barcelona atang veka Khawvela player manto ber ni tura an lak luh Neymar hian kum khatah £33m vel bawr a hlawh phak a, Mbappe hian kum khatah £19m. vel bawk a hlawh phak ve bawk. Messi hi an la lut a nih chuan a hlawh tam fal hle dawn ngei. Messi manah leh hlawhah insengso bak mahse tlarhmaah Messi Mbappe leh Neymar te an inkawp thei a nih ngat chuan anni aia hmuhnawm leh hlauhawm an awm kher lovang. Anni pathum inkawp hi khawvel hmuhchak a ni. PSG hian Messi hi an la lut thei a nih chuan mual chhungah leh mual pawna sumdawngna kawngah an hlawkpui hle ngeiin a rinawm thung.

Champions League-a champion zo ta lo PSG hian 2019-20 season-ah khan £107m zet an hloh niin tarlan a ni. Season tharah hian inkhel en turin mipui 5000 aia tam punkhawm phal a ni rih lo bawk si a, PSG hian hlawh sang fal hlawh tir tur leh a lakna tura sum hlawm lian seng bawk turin Messi hi an lei thei kher ang em tih chu zawhna lian tak a awm thung.

Messi club thar ni turin City chu rinkai an ni mek bawk a, Barcelona-a a pu hlui Pep Guardiola vang pawhin Messi hian City hi zawm a hreh lo hle tura ngaihna lian tak a awm mek a ni.

Messi chhuak tur chungchang leh a club thar tur chungchanga hi thuthar dang la awm belh zel tura ngaih a ni a, a tahtawlin rawn tarlan zel kan tum dawn nia.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy