Daily Newspaper

Lirnghing leh a nghawnga hmalak dan tur sawi

25

Tuipuiral huamchhunga lirnghingin pipute sulhnute leh khawtlang in leh lo a tihchhiat chungchanga hma lak dan tur leh rawtna awmte chu sawi ho a ni.

INTACH Mizoram Chapter chuan Tuipuiral huamchhunga lirnghingin pipute sulhnute leh khawtlang in leh lo a tihchhiat chungchangah state PWD, Directorate of Geology & Mining, Pachhunga University College leh Mizoram Unversity a mithiam, a hmuna kalte chu zirchianga hmalak dan ruahman turin a lo ngen tawh a. Heng a ngente hian report an siam tawh a ni.

Hemi chungchangah hian INTACH chuan geologist leh engineer rual a hmuna kalte bakah Art & Culture Department hotute nen August 26 khan Aizawlah an ngaihdan leh ruahmante an ngaihtuah ho a. Thasiama Seno Neihna tlanga lei khikna leh a minna chu he tlang bulhnai taka a awm loh rualin, a khik belh loh nana hmalak dan tur leh a tlang kham pang venhim dan tur an sawi ho. A tlanglawnna cement concrete-a siam chu mi tam tak mit tikhamtu ni mahse, tun dinhmunah chuan thiah chu a pawi zawk thei a, fimkhur a ngaia an hria thu an sawi. Lianchhiari Lunglen Tlang pawh tunah tha rih mahse, khi ve thei a ni a, a theih anga venhim dan tur sawi hoin, a lungpoh chunga kal pawh hi phal loh chin neih a tul tawha an hriat thu an sawi.

Mithiamte hmuh danin, tunhnai Tuipuiral lirnghing vanga in khi, bal leh chhe tam ber hi cement concrete (semi-pucca masonry leh pucca – reinforced concrete construction) a sakte an ni hlawm a; Assam type-a sakte chu an chhe lo berin an him ber zawk an ti. Hei hi a pawimawh hlea an hriat thu leh an pawl ngaihdan pawh a ni tih INTACH Mizoram chuan sawiin, an lehkhabu kum 2014-a chhuah, “Built Heritage of Mizoram” ah pawh an lo ziak tawh tih an pawl convener P Rohmingthanga chuan a sawi.

Thutkhawmah hian Assam type-a in sak dan tur te an sawi hoa, fumfe zawka mipuiin an hriatthiam zawnga ruahmanna siam nise an ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy