Turkey leh Syria-a lirnghing avanga nunna chan chu mi 21,000 an chuang tawh a, UN chuan he vanduainain chhiatna a thlen dan chiah hriatfiah theih a la ni lo a ti.
Rescuer te chuan la dam te chhanchhuah tumin theih tawp an chhuah mek a, mahse, lirnghing atanga ni li a liam tawh avangin beiseina a chau tawh hle.
Khawvawt tuk chuan harsatna nasa tak siam bawkin lirnghing atanga damchhuakte pawhin chenna mumal, tui leh eitur an nei mumal lo hle bawk a.
Turkey president chuan lirnghing chu ‘disaster of the century’ tihialin a sawi bawk.
Khawvel ram ten tanpuina nasa taka pek tumin ruahmanna siam mek a ni a. Ningani khan World Bank chuan Turkey hnenah infrastructure te dinthat lehna tur leh lirnghing tuarte chhawmdawl nan $1.78 billion a pek tur thu a sawi a.
Mahse, a hmuna chhanchhuah hna thawktu mi 100,000 te chuan harsatna tam tak tawkin vehicle mamawh tawk a awm lo va, kawngpui chhia a tam avangin chhanchhuah hna a tikhaihlak nasa hle.
UN chief Antonio Guterres chuan lirnghingin chhiatna a thlen dan chiah chu kan mita kan la hmuh zel tur chauh a ni tia sawiin a bik takin civil war-in a nuai sa tawh Syria chu tuar nasa zual tur a ti bawk.
Ninagni khan UN humanitarian aid chuan ramri kanin north-western Syria chu Idlib’s Ba al-Hawa pelin a lut a. Hei hi UN in Syrian sorkar thunun hmun te paltlang lova a thlen theihna kawng awmchhun a ni.
Guterres chuan tanpuina tam zawk pek tiamin UN Security Council chu ramri hmun khat chauha kan lova, hmun hrang hranga tanpuina pek a nih theih nana ramri kan theihna tur ruahman turin a ngen bawk a.
“Tun hi kan inlungrual hun a ni a, politics leh inhmelmakna te dahthat a ngai a, kan inpuih tawn a ngai a ni” tiin Guterres chuan a sawi.
Lirnghing thlen hnua Aleppo chhuahsantu fa pali nei tawh Munira Mohammad chuan intihlumna an mamawh thu sawiin ‘nizan khan a vawt lutuka tumah kan mu thei lo’ tiin a sawi.
White Helmet rescue group te chuan UN convoy lirnghinna hmun thleng thei chhun chuan hnawmhnawkin a chhilh te chhanchuahna tur khawl a keng tel thei lo an ti a.
“Pawi kan ti a, chutiang khawl chu nunna chhanhim nan kan mamawh ngawih ngawih a ni si a ni” tiin a sawi.