Lirnghingin Delhi a sawi

Delhi leh a chhehvel chu Thawhtanni tuk khan lirnghing magnitude 4.0-a nain a sawi a, thil tihchhiat leh thi leh hliam erawh an awm lo.
India sorkar hnuaia lirnghing viltu, National Centre for Seismology (NCS) chuan a intanna hi New Delhi tih a sawi a. Leihnuai km ngaa thuk atanga intanin zing dar 05:36-ah a nghin thu an sawi.
Thuneitu sang pakhat chuan a intanna lai tak hi Durgabai Deshmukh College of Special Education bul, Dhaula Kuan a nih thu news agency PTI hnenah a sawi a. A bul lawkah hian dil a awm a, heng lai vel hi kum hnih thum dan velah lirnghing na lem lo thleng ziah a ni a. Kum 2015-a a nghing khan magnitude 3.3 a ni.
Lir a nghin lai hian thawm ring tak hriat tur a awm bawk tih thuneitu chuan a sawi.
Prime Minister Narendra Modi-a chuan Delhi leh a chhehvela chengte chu chiai lo tur leh lir a nghina himna tur dan zamte zawm turin a ngen a. Khawpui ber bakah Noida, Greater Noida leh Ghaziabad-a cheng tam tak chu hlauvin pawnah an tlan chhuak a ni.
Delhi chief minister lailawk, Atishi pawh ‘lirnghingin Delhi a sawi thu leh mi tin an him theih nan a tawngtai thu a sawi a. Delhi Police pawhin, “In zavaia in him kan beisei,” tiin X-ah an tar lang.
New Delhi Railway Station-a inphova inzuar thin chuan engkim a insawi niin a sawi a. “Min dawrtute an te chelchul a ni,” tiin news agency ANI a hrilh.
Station-a rel nghaktu pakhat pawhin a bula dingte nen ‘leihnuai rel a lo thleng’ emaw an tih thu a sawi.
Ghaziabad-a cheng pakhat pawhin nghing chu a nat thu leh a hmain hetiang a la tawn ngai loh thu a sawi a. “In pum hi a insawi a ni,” a ti.
Delhi hi Bureau of Indian Standards (BIS) seismic zonation map-ah lir a nghin duhna ber pakhat, high seismic zone (zone IV)-ah a dah.
January 23 khan Delhi-NCR hi magnitude 7.2-a nain a lo sawi tawh a, hei hi China-a Xinjiang atanga intan niin lei hnuai km 80-a thuk atangin a ni.
Hemi hma chawlhkar hnihah khan Delhi leh a chhehvel hi Afghanistan-a magnitude 6.1-a a nghin hnuah na vak lovin a sawi tawh bawk.