Daily Newspaper

Lirnghingin Mizoram a sawi

48

November 26 zing khan Mizoram chu lirnghing na takin a sawi a. Lirnghing intanna hi India (Mizoram) leh Myanmar inrina bulhnai atangin nia hriat a ni.

Pachhunga University College-a Department of Geology report danin, Zirtawpni zing dar 5.15-ah Mizoram pum bakah India hmarchhak state te, Myanmar leh Bangladesh pawh nghawr khawpin lir a nghing a. Ministry of Earth Sciences hnuaia National Centre for Seismology-in report a pek danah chuan, a tha nghawr pek nat zawng hi magniture 6.1 niin, leihnuai km. 12-a thuka insiam a ni.

Lirnghing thlenna hmun hi Myanmar ram chhung (Latitude 22o 46’11.9994″ & Longitude 93o13’48”) niin, Indo-Myanmar range atanga irhchhuak nia rin a ni. He lirnghing hi PU College Broadband Seismic Station-ah pawh chhinchhiah a ni a. A nghing hma zanah lir hmahruai (foreshocks) tenau engemawzat a awm bakah a hnukhawi (aftershocks) vawi tam tak a lo chhinchhiah bawk.

Lirnghing hian Mizoramah bik chuan thil tihchhiat liantham a neih thu hriat a ni loa, concrete bang tih khik te a awm tih loh chu harsatna a siam emaw thil tihchhiat viau emaw a neih thu dawn a ni lo. PU College mithiamte chuan lirnghing kha Ningani zan atang khan a intham tan tih an sawi a. Zinga mihringin kan hriat theih khawpa a nat lai kha chu second 10 emaw vel niin, khatihlaia a nghin chhung erawh kha chu minute 2 vel niin an sawi.

Seismic Station an bun hnu ah chuan a la nghin nat ber a nih rualin, a epicentre hi Mizoram chhung a nih ngai loh avangin, a na ber emaw a nghawng nat ber tum emaw tia sawi turin an chhinchhiah hran lo nia thu dawn a ni.

PUC Seismic Station atang hian lirnghing nat zawng leh a thlenna hmun ai mahin, lir a lo nghin a, a siamtu lei inpelhsawlh ziarang zirna atan data a chhinchhiah a. Hengte atang hian kan hmalama lirnghing kan tawh mai theih dinhmunte thlenga zirbingna kawngah hriatna thuk zawk a awm thei tawh dawn a ni. PUC Station bakah Lunglei leh Khawbungah bun thuai tum a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy