Mizoram chief minister Zoramthanga chuan Union Minister of Mines Pralhad Joshi hnenah lehkha ziakin, tunhnaia Mizoram khawchhak tlangdung chu lirnghingin vawi tam tak a sawi tawh thu leh heng thil thleng hi uluk leh chiang zawka zir tur mithiam rawn tir turin a chah.
Chief minister hian June 21, 2020 atanga July 9 thleng khan Mizoramah magnitude 4.2 atanga 5.5 inkar lirnghingin vawi 50 chuang Champhai district a nghawr tawh thu leh, he lirnghing avang hian building engemawzat a chhiat tawh thu te, mipui a ti thlabarin, mahni ina mu ngamloa pawna mu pawh an awm thu a thlen a ni.
Union Minister of Mines chu Geological Survey of India atangin Mizoram dinhmun rawn zirchiang turin expert seismologist/ geo-physicist Mizorama tir turin Zoramthanga hian a ngen a. India hmarchhak state-te chu lirnghingin a nghawr nat theihna ber zone (Zone-V) a awm an nih avangin Mizoram khawchhak lamah Earthquake Observation Centre dah belh a nih theih nan hma laksak tur leh, district tin microseismic zonation tih a nih theih nan hma lakpui turin a ngen bawk.
Geology & Mineral Resources leh Geological Survey of India Mizoram Unit hnuaia geologist-ten GSI inkaihhruaina zawmin lirnghing hi an lo han zirchiang tawh a ni.
