Ni hnih chhungin Champhai chhehvel leh Vairengte ah Mizoram Police chuan dan loa tawlhruk ram dang kuva rah ro, lirthei 9-a phurh, an hralhna anga cheng nuai 190 chuang hu an man.
Mizoram Police thuchhuah siam danin, February 5 khan Champhai Police Patrolling Team chuan kuhva rah ro, LPK (407) MZ-02 8121, a khalhtu Lalsangliana (38) Champhai Ruantlang atangin kuhva bag 40 leh tipper 610 MZ-04 A 5268, a khalhtu C Vanlalhmingliana (34) Champhai Zote hnen atangin bag 35 an man a. Bag khat hi kg.80 zel niin, an hralh thinna anga chhutin Rs.18,00,000 hu a ni. Lalchhanhima (39) Ruantlang Champhai district ta a ni tih finfiah a ni a. Heng kuhva man bakah hian a phurtute leh a neitu nen Customs Preventive Force Champhai kuta hlan niin, dan anga hma lak chhunzawm tur a ni.
February 6 zing dar 7.00 vel khan Champhai Police chuan Tuipui khaw daiah lirthei panga atangin kuhva rah ro bag 730 an man a. Ashok Leyland (MZ-08 2049) Lalrinawma (34) Tualte khalh atangin bag 140; Ashok Leyland (MZ-04 A 3050), Lalrinmawia (35) Kawlkulh khalh atangin bag 140; Ashok Leyland (MZ-04 A 0918), Lalrinchhana (28) Electric Veng Champhai khalh atangin bag 150; Ashok Leyland (MZ-04 A 0399) Ramneihthanga (42) Bilkhawthlir khalh atangin bag 140; 610 truck (MZ-04 5311) Lalremthanga (35) Bethel Veng Champhai khalh atangin bag 160 an man a. Kuhva bag hi kg.80 zela rit niin, a belhkhawmin kg. 58400 vel a ni. Kg khat hi an hralh thinna Rs.300 anga chhutin Rs. 1,75,20,000 hu a ni a. Customs Preventive Force hnenah bawhzui chhunzawm turin hlan a ni.
February 6 zing dar 3.30 khan Vairengte leh Chhimluang inkara patrolling neihnaah Vairengte Police Station team chuan lirthei pahnih, AS-11 CC 8977, Jovrul Islam (21) Karimganj district Assam khalh leh MZ-06 A 2482, Karim Uddin (26), Bagha Assam khalh atangin ramdang kuhva bag 140 ve ve an man a. Lirthei leh a khalhtute hi Vairengte PS-a hruai an ni a, hma lak chhunzawm turin Kolasib district bawrhsap hnena thlen a ni.
Lirthei 9-a phurh kuhva tawlhruk cheng nuai 190 chuang hu man
