Traffic duty-te report pek bawhzuiin traffic lama thuneitu chuan tunhnai khan lirthei khalhtute tana zawm tur thuchhuah hetiang hian a siam a. “Nu-in an fate paw chung leh two wheeler (private & commercial) ah bawr tak taka school naupang phur hmuh tur kan awm ta fo mai a…kan naupang phurh lai lo muthlu ta mai te pawh hmuh tur an awm fo. Heng avangte hian two wheeler khalhtuten anmahni leh an mi phurhte himna ngaihtuah reng thin turin kan inngen. Naupang himna ngaihthah taka lirthei khalh hi ‘The Motor Vehicles (Driving) Regulations, 2017 Regulation 5 (8)-in lirthei khalhtute mawhphurhna a duan bawhchhiatna a ni a, Section 177 of The MV (Amendment) Act, 2019 hmanga hrem theih a ni…lirthei neitu zawng zawng ten lirthei an kalsan dawnin emergency-a biak pawh theihna tur phone number lirtheiah dah tur…”.
Traffic police-te hi lirthei veivak thunun tura ni tina thawkchhuak an nih avangin thil awmzia an hrechiangin an hmuchiang ber a, fimkhur tura thuchhuah a ngai tawh a nih chuan a pawimawh hle tih a hriat a. Hetianga thuchhuah siam kawngah hian, a hre tur leh a target bera te hi thuchhuah chhiar lo leh hre pha lo hlei hlei an ni duh viau a. Chuvangin a tam thei ang berin an hriat theih tura thuchhuah theh darh kawngah ruahmanna siam zui te a pawimawh dawn hle niin a lang. Naupang himna hi ram changkang apiangin an ngai pawimawh thin; lifestyle changkang intihhmuh lama hma sawn viau si hian naupang ngaihsak kawngah kan hniam hle lawi a, kan la changkang lo hle tih hriatna chu naupang himna kan la ngaihthah dan atang hian a lang chiang a ni.
Traffic tawt kan buaipui luai luai a, kawngpui siam belh thei tawh si lovin lirthei a maka maka tam ni tin a pung ruih ruih a. Traffic police-ten ban kham urha lirthei tlan vel an thunun laiin, kawngsir khawilaiah emaw car ding tlat avangin traffic a jam a, lirthei neitu biakpawhna tur contact nambar pawh hnutchhiah lo, lirthei hnuhsawn ngai khawpa kan la awm thei te hi, hremna nep lo tak hmanga chinfel dan ngaihtuah mai hi a hun tawh niin a lang.
Lirthei khalhtu fimkhur em em an awm a, mahse a fimkhur lote bawkin a fimkhur zawka te kha an chetsualpui hlauh bawk. Kawngsira kea kal fimkhur em emte pawh, lirthei khalhtu fimkhur loten an la su hram thin bawk. Chuvangin, lirthei khalh fimkhur lote hremna hi nep lo tak lekkawh ila, kan ziaawm deuh mahna?!
Lirthei khalhtute tana zawm tur thuchhuah
