July 25 khan hmun hniha lirtheia chetsualna avangin pa pahnihin nunna an chan. July 23 leh 24 khan lirtheia chetsualna avang bawkin nula pahnihin nunna an lo chan tawh.
Thudawn danin, Inrinni zan dar 9.30 vel khan PC Lalvuana (59) h/o Rochhari, Thingsulthliah chu lirthei chilhlum ni ngeia hriatin thia hmuh a ni a. Inrinni hian chhun lamah hna an thawk a, hemi zan dar 9.00 velah a fanu thlan tlawh tumin a kal a, dar 9.30 velah an in/khua atanga kala thlanmual pelh metre 100 velah kawngsirah a ruang hi hmuh a ni. A ruang hmuhna atanga hla lutuk loah hian truck-ah a khalhtu a chhunga lo muhil hmuh a ni a, khawchhung an tlan laia cctv atanga a lan danin, zurui khalh nia ngaih theih a ni bawk nen, rinhlelh thilah police-in an la a ni.
Vanduaina tawk PC Lalvuana fanu, Zonuntluangi (23) hi kumin May 14 zanlaiah khan Chanmari Aizawlah bike leh scooter intaiah scooter-a chuang zawk niin, an tluk tawh hnu ah chil zui a ni a, a hmunah hian a hliam tuar loin a thi a ni. PC Lalvuana hian a tuar hle a, fanu thlan pawh hi a tlawh zing hle tih sawi a ni.
Inrinni chawhnu dar 1.00 vel khan Hnahthial district chhung Thiltlang daia Bolero pik up chesualah Zoramcheuva (34), Pangkhua a thi. Thudawn danin, pik up chesual hi Aizawl atanga Pangkhua pan a ni a. Thiltlang luh hma km.1 velah chesualin kawng laiah a let. Lirtheiah hian mi 5 an chuang a, Zoramcheuva hi a fanu pahnih nen a hnunga chuang an ni a, amah hi a vanduai ta a ni. Midang hi chuan hliam na lutuk an tuar lo nia sawi a ni.
July 23 zan khan Mamitah leh July 24 zing khan Champhai leh Khawzawl inkara scooter chesualah nula pahnihin nunna an lo chan tawh bawk a ni.
Lirtheia chesualah pahnih thi
