Chandigarh nula, Shweta Sharda, kum 22, chu LIVA Miss Diva Universe 2023-ah thlan a ni a, Sonal Kukreja chu LIVA Miss Diva Supranational 2023 niin, Trisha Shetty chu LIVA Miss Diva 2023 Runner-up a ni ve thung. LIVA Miss Diva Universe 2023 hian kumina Miss Universe thlannaah India ai a awh dawn a ni.
Kumin LIVA Miss Diva Universe thlanaah hian contestant 160 an awm a, he pageant hi Miss Universe thlannaa India aiawh tur thlanna niin, he pageant hi kum 11 an kalpuina a ni ve ta. Tunhma chuan Miss India thlannaa Pakhatna chu Miss Universe-ah telin, pahninna chu Miss World thlannaah a tel ve leh nghal mai thin a, mahse, tunah chuan Miss India winner chu Miss World thlannaah telin, Miss Universe-a India ai awh tur hi a hranin an thlang leh ta a ni.
Kumin LIVA Miss Diva Universe thlannaah hian kalphung an tidanglam a, pasal nei lai emaw then tawh emaw, pasal hual lai nei emaw, hmeithai emaw te pawh an tel thei vek a, transgender tan pawh tel theih a ni. Judge panel-ah designer Abhishek Sharma leh Nikita Mhaisalkar, photographer Jatin Kampani, Miss Universe 2021 Harnaaz Kaur Sandhu, actor Pratik Gandhi, Srinidhi Shetty leh chuaitheilo Sangeeta Bijlani te an thu a ni.
Shweta hian grand finale-ah kawrfual tle sep sep, kak thui fahran mai, Nikita Mhaisalkar design a ha a, winner a ni tih an puan hnua nikum winner Divita Rai-i’n Miss Crown a khum tir dawn lai te chuan a hnuk ulhin, a mittui a tla hial a ni.
Shweta hi Chandigarh a piang niin, kum 16 a tlinin Mumbai-ah an pem a, tunah chuan nula kum 22 mi ni tawhin, reality show hrang hrangah a inlan tawh a, chung zingah chuan DID, Dance Deewane leh Dance+ te pawh a tel a, Jhalak Dikhlaja-ah pawh choreographer a ni nghe nghe. Pa tel loa a nuin a enkawl seilen a ni a, a nu chu a nuna mi pawimawh ber a nih thu a sawi bawk a ni.
Shweta hi social media lamah pawh a lar tawh sa viau a, Instagram-ah LIVA Miss Diva a nih hma pawhin follower 4,00,000 a nei tling tawh a, tunhnaiah Zubin Nautiyal leh Tulsi Kumar te hla sak ‘Mast Aankhein’ music video-ah Bollywood actor Shantanu Maheshwari nen an inlan dun tawh bawk.
LIVA Miss Diva Universe 2023 Shweta Sharda
