Daily Newspaper

Liverpool 3-1 Arsenal

14

Thawhtan zan khan English Premier League-ah inkhel ngaihven hlawh tak a awm a, champion lai Asenal chuan season thara bul tan tha, vawihnih chak zawn tawh Arsenal chu Anfield ah mikhual a, si phur hmasa zet mahse 3-1 a hneh letin point thum hlutak an hlawhchhuak. Inkhel dangah Aston Villa chuan khualmualah kai thar Fulham chu si thum fai ngawtin an sawp ve bawk.

Laipui puak hmasa
Anfield-ah fiahna hautak tak hmachhawn tura lenglut Arsenal hi ball chang tlem zawk leh hlauhawm lo zawk feah tang mahse an vanneih a siamin goal thun hmasaah an tang a, Anfield-ah Laipui a puak hmasa ve teh mial.

Liverpool hian an mikhual Arsenal te hi an ngam viau a, Chelsea an hmachhawn tum ang bawkin game mawi tak an phochhuak leh a, team inman leh hlauhawm an nihzia an lantir chiang hle. Jurgen Klopp-a ruahman ang takin an khelchhuak a, an game a dak tha hle. Ball chang tlem zawkah tang mahse Gunners pawhin game mawi an lantir ve tho va, an khel en a nuam hle.

Mikel Arteta-a team te hi bet zawkah tang mahse minute 25-naah an an chefuh a, vanneih a siamin goal thun hmasa zawkah an tang ta tlat thung. Reds defender Andy Robertson tihsual vangin Alexandre Lacazette chuan vannei ang reng takin hmahruaina goal a thun teh tlat. Goal an chhuah hnuin Reds hian na takin an mikhualte an nawr let nghal a, goal pawh an thun har lo. Minute 28-naah mawi taka ball an inpek kual hnuin Mohamed Salah chuan tha zetin a pet a, Arsenal si nghak Berd Leno chuan Salah pet hi lo dang bawk mahse Sadio Mane tan hun remchang a siamsak lek fang a, Mane hian hnai setsawt atangin chiang zeta pet goal in an si phur a sut.

1-1 a an inhnehtawk hnuin Jurgen Klopp-a team te khel a mawi leh zual a, an game rang tak chuan Arsenal harsatna a thlen. Minute 34-naah a tihsual siamthain Andy Robertson chuan hma an hruai letna goal a thun. Chawlhlawk hmain game thunun zui hle mahse goal dang an thun belh thei bik loav, 2-1 a hmahruai chungin chawlhlawk an hmang.

Chawlhlawk hnu lamah Liverpool hian game rang tak lantir in, inkhel hmuhnawm an pholang a, Arsenal tlarhma thuhrukin an awm a, an tlarhnung player hmuh tur an tamin an rim hle thung. Bet tak chungin Gunners hian goal thun theihna hun tha an hmu nawlh a, goal hmahruai thuntu Lacazette chuan goal thun theihna hun tha zet mai a nei a, si nghak Alison a pet khum zo lova, uiawm takin a hun tha a hloh.

Liverpool in Wolves atanga an lak luh thar Diogo Jota chu hun tawp dawn hnaih lamah luhtir a ni a, hlauhawm taka a shot fur fur hnuin hun tawp dawnah a che fuh a, minute 88-naah an goal thumna a thun a, an chakna a nem nghet. Reds chuan Jota hi Wolves atangin £45m sengin an la lut a, Mane thlachhang dawltu tha leh rintlak tak a ni ngei dawn tih a game hmasa ber atangin a lantir nghal zat.

Champion lai Liverpool hian team tha an nihzia an lantir zel a, an khelh hmasak pathumah hnehna chang vekin bul an tan tha a, an squad an thuamchak thar bawk nen champion nawn leh turin rin an kai sawt hle. Player thar la tam lo mahse an lak chhunte an chhawr tangkai ngei dawn a, Thiago Alcantara leh Diago Jota te hi an mamawh chhanna, an squad tichhah lehzualtu an ni ngei dawn a ni.

Liverpool leh Arsenal te hi ninga zan khian an intawng zui leh zat dawn a, Carabao Cup fourth round-khelin Anfield-ah an intawng nawn leh ngat dawn a ni

Villa chak chiang
Thawhtan zana inkhel hmasa zawkah Aston Villa chuan khualmualah kai thar Fulham an hmachhawn a, 3-0 ngawtin hnehna an chang.

Villa hian khualmualah bul an tan tha tak zet a, minute lina lekah captain Jack Grealish chuan hmahruaina goal a thun nghal pang. Villa hian an khingpuite nawr zui zelin minute 15-na lekah Conor Hourihane chuan goal a thun belh a, si hnih faia hmahruai chungin chawlhlawk an hmang. Chawlhlawk hnu lamah pawh an khel tha chhunzawm zel a, minute 48-na lekah Tyrone Mings chuan goal a thun belh leh nghal zat a, an chetha tluang zel a, khelh riat chhung chu tlawm nei lovin an kaltluang ta a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy