February 11, Pathianni zan khan English Premier League-ah inkhel pakhat a awm a. Merseyside derby hmuhnawm takah Liverpool chuan Anfield-a an mikhual Everton chu si hnih faiin an hneh. Season kal meka khel tha lo Liverpool tan hian an player thar Cody Gakpo chuan goal a hmasa ber a thun.
Anfield a inhmachhawn Liverpool leh Everton te hi season kal meka khel tha lo, beisei anga che tha lo ve ve an ni a. Point thum hmu a, insiamthatna kawng zawh turin team hnihten chak an mamawh hle ve ve. Everton hi manager thar Sean Dyche hnuaia phur thar, hmahruaitu Arsenal meuh pawh hneh thei an nih vangin an hmelma Liverpool lakah chak turin an inringtawk viau a. Reds hian Merseyside Derby ah tlawm an tum hauh lo bawk.
Table-ah 10-na luah mektu Liverpool hi 17-naah awm a, tlahniam thei dinhmuna ding mek Everton lakah an khel tha a, ball chang tam zawkah tangin, hlauhawm pawh an siam tam zawk. An mikhualte nawr viau mah se Reds hian goal an thun thei lawk lo thung. Everton hi goal thun hmasa zawkah an tang teuh hle. Defender James Tarkowski tauh tha tak chu goal ngei tura ngaih a nih laiin goal ban a per a, vanduaithlak takin a goal lo.
Vanneihthlak taka an him hlauh hnuin Reds hian tha zetin an mikhualte an nawr let nghal a. Minute 36-naah Darwin Nunez siamsak atangin Mohamed Salah chuan Liverpool hmahruaina a thun ta nge nge a, Everton an him reng thei lo. Salah hian Toffees si nghak Jordan Pickford awmhmun fuh tawk lo a hrem a, awlsam takin a pet goal.
Salah hian Anfield ah 00 Premier League vawi 104 a hmachhawn tling ta chiah a, Anfield ah bik EPL goal 100-ah a inrawlh tling ta chiah. Anfield ah bik hian EPL goal 71 a thun a, assist vawi 29 a nei tling bawk. Salah goal thun hmang hian si khat faia hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm zel a, goal an thun leh thuai. Second half tan atanga minute lina lekah counter attack atangin an khingpuite an nawr tlang leh a. Ding lam sir atanga Alexander Arnold siamsak tha tak chu Cody Gakpo chuan awlsam zetin a pet goal a, an goal hnihna thunin, an hmahruaina a tizau.
Liverpool in thlasik bazarah £45m senga an lak luh Gakpo hi PSV Eindhoven leh Netherlands tan khel tha viau thin mah se, a club thar Liverpool ah beisei angin a che tha lova, goal a thun thei lawk lo. Liverool tan EPL-ah vawili a khelhnaah goal a thun ve ta nge nge. Goal a thun tak vang hian manager Jurgen Klopp leh Netherlands manager Ronald Koeman te pawh an thawk huai a rinawm a, Gakpo ngei pawh hian inrintawkan leh phurna sang zawk a neih belh ngei a rinawm.
Gakpo goal thun hnu hian goal thun belh tumin team hnihte an innawr zui chiam a, hun tawp thlengin goal dang a luh belh thei tawh lo thung. Chak mamawh em em Liverpool chuan an hmelma lian Everton lakah si hnih faiin hnehna an chang a, point thum an hlawhchhuak ta nge nge. Reds hian EPL-ah vawi 20 khelin point 29 an hmu a, 10-naah an awm mek. An chunga mite aiin a khel tlem zawk vek thung a, top 4 beiseina an la nei det det.
An hmelma lian Liverpool lakah an tlawm vangin 17-naa awm mek Everton dinhmun a chhe zual sauh thung a. Manager thar Sean Dyche hnuaiah him hram tumin thapui an thawh zui ang. Toffees hi 17-naah awm mek mah se vawikhat chaka hmasawn dawrh thei an nih vangin an dinhmun a chhe ngawih ngawih hran lo.