Nilai zana UEFA champions League khelhah Liverpool chu an mikhual PSV Eindhoven lakah 4-1 ngawtin an tlawm a, khelmual ropui Anfield-ah ngei an mualpho nawn leh. Liverpool rual hian Inter Milan pawh an tlawm a, hetihlai hian Mbappe goal li thun hmangin Real Madrid an chak ve thung.
Reds a sen lar thei lo
EPL champion Liverpool hi EPL an khelh hnuhnung pahnihah 3-0 ve vein an tlawm zawn a, an lo mualpho tawh. EPL-a an tlawm hnuhnung zawk hi Pathianni zan mai kha a ni a, Anfield-a an mikhual Nottingham Forrest lakah 3-0 ngawtin an tlawm teh reng a nih kha. Club ropui Liverpool tan chuan 3-0 a tlawm zawn hi a na satliah a ni lova, an mualphothlak tak zet zawk hial a ni.
EPL-ah an mualpho zawn hnuin Champions League lamah insiamtha a, an mualpho thup mawi theihna hun remchang an nei. Table hnuai lama awm PSV Eindhoven chu Anfield-ah an mikhual. English club ropui Liverpool tan PSV hi hneh harsa lo tura ngaih a ni. Mah se…mah se, PSV lakah 4-1 ngawtin an tlawm leh tlat si.
Chak mamawh Liverpool hian Anfield-ah bul an tan chhe hle. Inkhel tan atanga rei loteah captain Virgil van Dijk chuan handball vangin penalty a chawi nghal. He penalty hi Ivan Peresic chuan inringtawk takin a pet goal a, minute 6-na lekah hmahruaian goal a thun.
Goal an chhuah hnuin Liverpool an khel tha nghal viau a, an khingpuite an nawr buai thei hle. Reds tan hian Dominik Szoboszlai chuan minute 16-naah goal thunin an si phurh a sut. 1-1 a nih hnuin inkhel a hmuhnawm zui viau a, goal dang luh belh lohin chawlhlawk an hmang.
Chawlhlawk hnu lamah PSV an khel tha chhunzawm a, an vannei tel bawk. Guus Til chuan minute 56-naah hma an hruai nawn lehna goal a thun a, Reds a barakhaih nawn leh. Reds in an si phurh sut tum viau mah se an hlawhtling thei tawh lo. Liverpool in goal thun an mamawh em em laiin PSV tan Couhaib Driouech chuan goal hnih a thun zawn leh ta mai a. Khelmual ropui Anfield-ah ngei hnehna lian an sualchhuak a, point thum hlu tak an hmu zui ta a ni.
Inter Milan an tlawm
Thawhleh zana inkhel dangah vawi li chak zawn thei team pathum zinga mi Inter Milan chu Atletico Madrid hneh lovin an tlawm. Inter an tlawm vangin Arsenl chu UCL 2025-26 ah vawi nga chak zawn thei awmchhun an ni.
Atletico Madrid hian an mualah bul an tan tha viau a, Julián Álvarez chuan inkhel tan atanga minute 9-na lekah hmahruaina goal a thun nghal. Hma takah goal thun bawk mah se an mualah an chak zo bik lo teuh hle. Inter Milan tan hian Piotr Zielinski chuan minute 54-naah goal thunin an si phurh a sut. Hun rei tak chhun 1-1 in an inhnehtawk a, chak zawk an awm theih loh mai a rinawm hman. An inhnehtawk reng hnuin Atletico Madrid tan José María Giménez chuan minute 90’+3-nah goal pawimawh tak a thun a, Italian team lian Inter Milan lakah hnehna an chang zui ta a ni.
Thawhleh zana inkhel dangah Real Madrid chuan Kylian Mbappe goal li thun hmangin an khingpui Olympiacos an hneh thei hram a, harsa takin point thum an hmu. Real Madrid tana vul tan Mbappe hian minute 22, 24 leh 29-ahte goal thun zawnin hattrick a siam a, UCL-ah hattrick siam rang pahnihna a ni.
Liverpool an mualpho nawn leh
