Site icon The Aizawl Post

Liverpool an pawr zuih

February 21, Thawhleh zan khan UEFA Champions League – last 16 khelh chhunzawm a ni a. Premier League club ropui Liverpool chu an khelmual Anfield-ah ngei an pawr zuih a, an mikhual Real Madrid lakah 2-5 ngawtin an tlawm. An mualah si thum ngawta an tlawm vangin Reds hi tla tluk an ni tawh a, UCL-ah an tan beisei tur a tam tawh lo. Hetihlai hian Anfield-ah 5-2 ngawta chak Real Madrid hi champion turin rin an kai thar viau thung.
Reds an pawr hma
English club zingah European competition-a hnuhma nei tha ber Liverpool leh champions League a vawk lal len Real Madrid te hi season liam ta UCL final-a inhmachhawn an nih vangin final rematch hian ngaihven a hlawh a. EPL a chetha lo Liverpool hi Anfield-a inlan tur an nih vangin La Liga champion Real Madrid an hneh theih rinna lian tak a awm. Tualchhung league-ah an chet that loh lai pawha Europe a che tha tlat thin an nih miau vangin dah hniam theih an ni lo. Rin lawk ang ngeiin Reds hi an mualah ngei an par vul hma viau a, minute 14 chhung lekin goal hnih an thun hman. Anfield-ah par sen hma viau mahse an par vul lai thliah a ni thuai thung.
Liverpool hian champions league final-a an hneh loh zawn Real Madrid hi ngam takin an nawr nghal a, goal pawh an thun hma hle. Inkhel tan atanga minute lina lekah Mohamed Salah ball pek tha tak chu Darwin Nunez chuan inring tawk zetin a kheng goal a, awlsam takin hmahruaina goal a thun.
Hma takah goal an thun hian Jurgen Klopp-a team te inrintawkna sang zawk a pe, an mualah ngei phur takin an inlan zui theih phah. Nunez goal thun hnu hian Salah in goal a thun belh zui teuh hle. Aigupta tlangval Salah hian fuh zeta a khalh tlang hnuin goal chhungah a pet lut thei lova, uiawm takin a hun tha a hloh. Salah hian a hun tha neih hmasak hloh mahse vanneihthlak takin hun tha zawk a nei zui leh. Real Madrid si nghak Thibaut Courtois chu ho zetin a chesual a. Belgium si nghak box chhunga awm Salah hi ball a pe ringawt. Salah hian pet goal tur liau liau a Thibaut Courtois ball pek hi awlsam takin a lo pet goal a, minute 14-naah an goal hnihna a thun.
Minute 14 chhung leka goal hnih an chhuah hman vangin UCL a vawk lal len Real Madrid chak lohna ni a herchhuak dawn ta nge nge a ngaih a ni hman. Dinhmun chhe taka ding Real Madrid tan hma taka goal hnih an chhuah hi an ropuizia tilang chiang zualtuah an chantir hlauh thung a. ‘Real Madrid nge nge’ tih ngei ngei ngai turin mualneitu Liverpool hi goal nga ngawtin an chhang let ta thung.
Dinhmun chhe takah dingin, goal hnih ngawt chhuah tawh mahse Real Madrid hi an hnual mai lova, huaisen takin an khingpuite an nawr let a, rin loh takin an khel tha tulh tulh. Mawi taka ball an inpek kual hnuin minute 21-naah Vinícius Júnior chuan chep tak kar atangin a pet goal a, an si phurh a sut then. Vinícius Júnior goal hian champion lai Real Madrid a fuih phur viau a, danglamna thlen tu a ni zui ta bawk.
An si phurh an sut then hnuin Real Madrid chu hlauhawm zawk an ni zui nghal a, goal pawh an thun belh leh thuai. Real Madrid si nghak Courtois ang tho vin Liverpool si nghal Alison a chesual ve leh a. Alison hian back pass petchhuah a tumna lamah Vinicius Junior a pet per ringawt a, an lamah goal a luh phah. Alison chetsual vanga rin loh taka goal thun mial Vinicius goal hmangin minute 36-naah an si phurh an sut zova, 2-2 a inhnehtawk chungin chawlhlawk an hman theih phah.
Chawlhlawk hnu lamah Real an khel tha leh zual a, hma hruai letna goal an thun thuai. Bul an tan hnu lawkah an khingpuite an nawr tlang nghal zawk a. Vinicius Junior chuan box bul lawkah free kick a hlawhchhuak nghal. Free kick an hmuh hi Luka Modric chuan fing zetin a chhuih a, minute 47-naah Éder Militão chuan chiang zeta tauh goal in, hma an hruai letna goal a thun.
Hma an hruai let hnuin Real Madrid an hlauhawm leh zual a, hnual taka inlan Liver-pool in an dang hleithei meuh tawh lo. Los Blanco hian fuh zetin an khingpuite an nawr tlang zui leh thuai a. Minute 55-naah Ballon d’Or kawl mektu Karim Benzema ball pet chu Reds defender Joe Gomez chuan an lamah a dang pial lut a, Real Madrid in an hmahruaina an tizau. Si hniha hma an hruai let tak hial vangin Carlo Ancelotti team te hian Jurgen Klopp-a team te an ngam tak zet tawh a, chak tur a chiang deuh kuarh tawh bawk. 4-2 a hmahruai tawh Real Madrid hian Santiago Bernabeu-ah awlsam zawka hnehna chang a, quarter-final an luh theih nan goal an thun belh zui leh. Minute 67-naah chiang zetin an khingpuite an nawr tlang zui leh. Vinicius nen fuh taka ball an inpek tawn hnuin Benzema chuan Reds si nghak Alison a bum zui leh a, awlsam taka pet goal in an goal nga a thun a, mikhual tan chet harsatna hmun Anfield-ah ngei Real Madrid chuan 5-2 ngawtin hnehna an chang zui ta a ni.
An mualah ngei 5-2 ngawta an tlawm vangin Liverpool hi tla chiang tawh anga ngaih an ni a. UCL a che ropui thei tak Real Marid hi Santiago Bernabeu-ah si thuma hmahruai sa chunga inlan tur an nih vangin Reds tan lehthal turin thil makah pawh mak leh ropui bik an thlentir a ngai tawh dawn. Reds hmabak a hautak em em lai hian Real Madrid erawh chu quarter-final lut chiang tawh ang a ngaih a ni thung.
Thawhleh zana inkhel dangah Bundesliga club Eintracht Frankfurt chu Deutsche Bank Park-a an mikhual Napoli lakah si hnih faiin an tlawm ve bawk a. Europa League champion Frankfurt pawh hi tla chiang tluka ngaih an ni ve bawk.
Deutsche Bank Park lenglut Napoli tan hian Victor Osimhen chuan minute 40-naah hmahruaina goal a thun a. Minute 58-naah mualneitu player Randal Kolo Muani hnawhchhuah a nih hnuin minute 65-naah Giovanni Di Lorenzo chuan goal a thun belh.

Exit mobile version