Liverpool atangin Salah
a chhuak dawn
English Premier League (EPL) a player ropui ber zing a mi. Liverpool player ropui, Liverpool ti par vul a, chawi sangtu nih tling, kawr sen nena inhmeh em em Mohamed Salah chuan season tawp hunah Liverpool chhuahsan turin thu tlukna a siam ta.
Anfield atanga inpuchhuak ve mai tawh tur Salah hian kum 2017 khan AS Roma atangin English club ropui Liverpool a zawm a. Reds in Salah lak nan £34m an seng. Manchester City midfielder ropui Kevin de Bruyne ang thoin Salah hian EPL club dangah hun a lo hmang tawh a, a hlawhtling nghal mai bik lo. Liverpool a zawm hma hian Chelsea a zawm hmasa zet a. Blues tan hian vawi 19 khelin goal hnih chauh a thun. Chelsea tan hian vawi 10 chauh bul a tan nghe nghe. Hmun pawimawh a chan phak loh vangin Liverpool aia a thlan, FC Basel atanga a zawm ta zawk Chelsea hi reilo teah a chhuahsan a, Italian Club lian AS Roma a zawm.
Italian Serie A ah vul a, hming a chher hnuin amah awt em em thin Liverpool chuan kum 2017 June thla khan an la lut ta nge nge a ni. Chelsea ah khawhar riangvai taka awm a, tu khawkha ngaihsak loh khan Anfield ah par a chhuang a, lal ang mai a ni ta thung. Liverpool hi Champions League ah vawi khat a champion pui a. Premier League ah vawi hnih a champion pui bakah FA Cup, EFL Cup, Uefa Super Cup leh Fifa Club World Cup ahte a champion pui ta hial a ni.
Aigupta tlangval Salah hian Liverpool tan inelna hrang hrangah vawi 435 zet a khel a, goal 255 lai thunin Liverpool tana goal thun tam zual zingah pathumna a ni a, a chungah Ian Rush leh Roger Hunt te an awm. Reds tan hian Premier League ah bik vawi 310 a khel a, goal 189 thunin assist vawi 92 zet a nei bawk. Liverpool tan goal contribution a neih zawng zawng hi 281 zet a ni a, EPL ah club khat tan goal contribution ngah ber a ni a. A hnuai chiaha awm Wayne Rooney aiin goal contribution vawi ngain a nei tam zawk.
Salah hian Liverpool tan a khelh chhungin Premier League ah Golden Boot vawi li a dawng a. Kum 2018, 2022 leh 2025 khan Professional Footballers’ Association Player of the Year ah thlan a ni nghe nghe a ni.
Inthlahna thu chu
Vau thla ni 24, Thawhlehni a lo inherchhuak a. He ni hi Liverpool tantute leh Mohamed Salah tan ni hriat reng tawh tur, Salah-a’n Liverpool an chhuahsan tur thu a puan chian ni a ni.
Salah chuan, ‘Malin ka kal ngai lovang’ a ti hmasa te te a. “Chibai vek ule, Liverpool a chhuahsan tur thu ka puan a ngai ta a, pawi ka ti hle mai. Hei hi kan inthlahna tur phek hmasa chu alo ni ta a, season tawp hunah hreh tak chungin ka inpuchhuak ve tawh dawn a ni”.
“He khawpui leh a chhunga cheng mipuite hi ka nuna peng pawimawh tak pakhat an ni. Liverpool hi football club a ni satliah lo, ngainatna, rilru leh thlarau thlenga inzawmna a ni. history leh football club. Ka tana a hlutzia hi lei tawng leh vantirhkoh tawng pawha sawifiah thiam rual loh a ni. In zavaia chungah ka lawm tak zet a ni. He club chhuahsan hi thil awlai a ni hauh lo. Inpuchhuak tehreng pawh ni ila ka thinglungah erawh in cheng kumkhua tawh ang. Liverpool hi chhuahsan bawk mah ila nangni pawhin malin min awm tir ngai lo ang tih ka hria. Malin ka kal ngai lo ang”, tiin inthlahna thun a sawi.
Khawi lamah nge?
Club player ropui, hriat hlawh ni reng tawh tura Liverpool chhuahsan tur Mohamed Salah hian eng club nge a zawm dawn tih chu mi ngaihven a ni. Lak tuma lo hel ve tawh reng thin Saudi Arabia club lian Al-Ittihad leh Al-Hilal te nen sawi zawm an hlawh viau a. Major League Soccer (MLS) club San Diego FC nen sawi zawm an ni mek bawk.
Saudi Arabia lam a pan a nih chuan khawvela player hlawh hnem ber pawl a ni thei dawn a. USA lamah a kal a nih pawhin a hlawh chhe dawn hauh lo thung. Saudi Arabia club te nen sawi zawm hlawh viau mah se Salah a agent Ramy Abbas chuan an clun thar tur chungchangah thutlukna annla siam fel loh thu a sawi.
Liverpool atangin Salah a chhuak dawn
