Liverpool in Arsenal an hnawtchhuak

January 7, Pathianni zan khan English FA Cup Third round khelh chhunzawm a ni a. Inkhel ngaihven hlawh takah Liverpool chuan si hnih faiin FA Cup-a champion ngun ber Arsenal an hneh a, an hnawt-chhuak. Inkhel dangah champion lai Manchester City chuan awlsam takin hnehna an chang ve thung.
An mualah Arsenal an tlawm
English Premier League lamah pawh champion tuma inum a, table chung ber inluah chhawk zak zak Arsenal leh Liverpool te chu Emirates Stadium-ah an inhmachhawn. Gunners leh Reds te hi EPL a an inkhelh hnuhnung bera inhnehtawk an nih vangin FA Cup-ah pawh hian an inhnehtawk leh viau tura ngaih a ni a. An inkhela chak zawk zawk hi champion tura rinkai an ni zui nghal dawn bawk. Beisei lawk ang ngeiin inkhel a hmuhnawm viau a, hun tawp dawn hnaihah Liverpool an vannei a, goal hnih an thun zawn.
Kawr var, mimal hming ziah kai lohna ha chungin Arsenal hi an mualah an inlan a, an mikhualte hneh ngei tumin tan an khawh nasa hle. goal thun theihna hun tha nei thin bawk mah se striker hriam an neih loh an tuar nawn leh a, hun tawp thlengin goal an thun thei lo tluan a, an mualah an tlawm ringawt.
Inkhel hmuhnawm takah hian goal a lut har hle a, goal a luh har em vangin an inhnehtawk mai a rinawm hman hial. Goal thun tuma an innawr tawn chiam hnuin Juegen Klopp-a team ten hlawhtlinna an chang. Minute 80-naah Alexander Arnold corner pet hlauhawm tak chu Arsenal defender Jakub Kiwior chuan an lamah a tauh lut a, mikhual team hmahruaina goal a thunsak.
Goal an chhuah hnuin Arsenal in an si phurh sut ngei tumin thapui an thawh. An si phurh sut an tum lutukna lamah an chesual a, Reds nawr let an tuar lo. Liverpool hian an khingpuite hi fuh zetin an nawr let a. Diago Jota siamsak tha tak chu Luis Diaz-ah top-corner-ah chiang zetin a pet goal a, minute 90’+5-naah an goal hnihna a thun a, an chakna a nem nghet. Diaz goal thun hnu hian hun a tawp zui a. FA Cup a champion ngun ber Arsenal chu Liverpool hneh lovin an tlawm a, an puanthuah an tel zui ta a ni.
Arsenal hnawt-chhuaktu Liverpool hi season kal meka inelna hrang hrangah an chetha hle. EPL-ah hma an hruai mek a, Carbao Cup lam ah semi-final an lut tawh a, Fulham hmachhawnin final luh ngei an tum zui dawn. Hei bakah hian Europa League lamah pawh last 16 an lut fel tawh bawk. Season liam taa Manchester City ang khan Reds hian Treble champion nih theihna hun tha tak an nei.
Liverpool an chet that laiin Arsenal erawh chu FA Cup leh League cup atangin an tla tawh thung a. EPL leh Champions League-ah champion beiseina sang tak an la nei thung. FA Cup atanga an tlak leh tak vangin Gunners tan hian kut benga season khar mai a hlauhawm leh ta viau thung.
Chelsea an chak nuamsa
Pathianni zana FA Cup third round inkhel dangah champion lai Manchester City chuan Etihad Stadium ah Huddersfield Town an mikhual a, si nga faiin an chak a, hnehna nuamsa an chang.
Champion lai City hian an mikhual championship team Huddersfield Town lakah khel tha viau mah se goal erawh an thun thei lawk lo thung. Beisei anga goal lut a awm lawk loh hnuin Phil Foden chuan minute 33-naah hmahruaina goal a thun. Foden goal thun atanga minute li hnu lekah Julian Alvarez chuan an goal hnihna a thun zui leh a. Si hnih faia hmahruai chungin chawlhlawk an hmang.
Chawlhlawk hnu lamah Foden leh Jeremy Doku ten goal an thun belh leh a, Ben Jackson-a’n an lamah a ti-goal bawk. Kevin de Bruyne kir lehnaah City hian singa faiin hnehna an chang ta a ni.