Liverpool in last 16 an lut

January 21, Thawhleh zan khan UEFA Champions League khelh chhunzawm a ni a, Liverpool chuan an mikhual Lille chu 2-1 a hnehin an hmahruaina an humhim a, last 16 lut hmasa ber an ni. Liverpool an chak lai hian Aston Villa chu mikhual an nihna hmunah an tlawm ve thung.
Salah goal 50
Season kal meka chetha tak; English Premier League leh Champions League lama hmahruai kawp mektu Liverpool hian Anfield-ah French club Lille an mikhual. An mikhual lakah tha takin an inlan a, Mohamed Salah leh Harvey Elliott te goal thun hmangin hnehna an chang. An mualah hnehna chang bawk mah se Liverpool tan chak a awlai lo viau a, tam zawk an nih hnuah chakna goal an thun theih chauh a ni.
An mualah khel tha viau mah se Reds hian beisei angin goal an thun hma thei lo. Goal thun tumin nawra viau thin mah se goal thun tur khawpin Lille tlarhnung an thait chiang thei bik lo. Lille pawh hian mualneitu an tihthaih ve reng bawk a, chak tur zawk rin thiam harsa khawpin an inhnehtawk. Goal lut a awm theih loh reng hnuin mualneitu Liverpool in goal an thun ta nge nge. Fuh taka an khingpuite an nawr let hnuin Mohamed Salah chuan minute 34-naah fuh takin a pet goal a, hmahruaina goal a thun.
Hmahruaina goal thuntu Mohamed Salah hian Liverpool tan champions league-ah goal 50 a thu tling ta chiah a. Anfield club tan hnuhma lian a hnutchhiah belh. UCL-a goal 50 thun tling Salah hi player of the match ah thlan a ni zui ta nghe nghe a ni.
Tun hnaia khel tha, an match hnuhnung vawi 21-ah tlawm nei lova kal tluang mek Lille hian inlehthalna lian thlentir tum viau mah se chawlhlawk hnu lamah an chesual thuai thung. Goal thun an mamawh em em chungin Aïssa Mandi chu minute 59-na lekah hnawhchhuah a ni. Liverpool lakah hnufual zawk nih laia tlem zawk nih leh bawk si chu Lille tan vanpui a chim hi a ni hawt mai. Mah se, an dinhmun a chhe viau chungin minute 62-naah Jonathan David chuan goal thunin an si phurh a sut a. Inkhel boruak a chawk nung thar leh ta tlat thung.
Goal an chhuah hnuin Liverpool an insangmar thar leh a, goal pawh an thun nawn leh thuai. Goal an chhuah atanga minute nga hnu lekah Harvey Elliott hma an hruai nawn lehna goal a thun. Elliott goal thun hi hun tawp thlengin an humhim a, Liverpool in an mualah hnehna an chang zui ta a ni.
An mualah an chak leh tak vangin Liverpool hian khelh sarih atanga point 21 hmuin hma an hruai chhunzawm zel a. UCL season kal mekah chak vek awmchhun an nih chhunzawm zel bakah last 16 lut hmasa ber an ni ta bawk.
Aston Villa an tlawm
An muala chak Liverpool in last 16 an luh chian laiin UCL-ah rin aia khel tha Aston Villa chu Stade Louis-II-a an khingpui AS Monaco lakah 1-0 in an tlawm a, table-ah an tawlh hnung ve hret thung.
French club lian AS Monaco tan hian Wilfried Singo chuan minute 8-na lekah an mikhual Aston Villa laka an hmahruaina goal a thun a. Minute riatna leka an goal thun hi EPL club lakah chakpuiin point thum hlu tak an hmu zui ta a ni.
Monaco laka tlawm Villa hian point 13 hmuin pariatna an luah chhunzawm a. Villa point hmuh zat hmu mek bawk mah se Monaco hian 10-na an luah ve thung.