Daily Newspaper

Liverpool in UCL last 16 an lut

11

Thawhleh zan khan champions league groups stages khelh chhunzawm a ni a. Champion hlui Liverpool chu hliamin tibuai nasa hle mahse Ajax lakah an chak hram a, last 16 an lut. Inkhel dangah Manchester City leh FC Porto te an inhnehtawk a, City hi group champion an ni chiang nghal.

Reds an vannei
Hliamin a tihbuai nasat em em Liverpool hian Anfield-ah Netherland club lian Ajax an mikhual a, ball chang tlem zawk ni chungin si nghak Onana chetsual zar an zo va, Jones goal thun hmanga hnehna chang hramin, vanneihthlak takin an chak a, last 16 an inhlangkai. Ajax an hneh hi Reds manager Jurgen Klopp chuan an tan hnehna lian leh hlut bik tak a nih thu a sawi.

An khelmual hman thiam Anfield-ah ngei Serie A club Atalan ta an hneh loh hnuin Premier League champion Liverpool chuan Ajax an mikhual zui leh. An mikhual lakah fimkhur takin an inlan a, an rawltharte an chetha hlawm hle. Hun pumpuiah mikhual team Ajax hian ball an chang tam zawk a, ball an chan zat hi 56% a ni. Shot neih hnemah pawh an inthlau lo hle a, Liverpool hian shot vawi 15 an nei a, goal zawnah vawi 5 a kal. Ajax hian shot vawi 11 an nei a, goal zawnah vawi li a kal ve thung.

Anfield-a inkhelah hian goal lut a awm lawk thei lova, chawlhlawk hmain goal hmuh tur a awm lo phawt. Chawlhlawk hnu lamah erawh goal a lut ta thuai thung. Minute 58-naah Neco Williams chuan tha takin a cross. He ball kalah hian Ajax si nghak Andre Onana a chesual a, ball kal a tehsual vangin Liverpool tan Curtis Jones chuan awlsam takin a pet goal a, hmahruaina goal a thun ta a ni.

Ajax hian an si phurh sut ngei tumin tan an khawh a, hlauhawm siam zauh zauh mahse rawlthar si nghak Caoimhin Kelleher chu mit la takin a inlan a, mikhual team in an paltlang thei lo. Champions League-a a inlanna hmasa berah Caoimhin Kelleher hi a chetha viau a, fak a hlawh hle nghe nghe. Hun tawp thlengin goal dang a luh belh theih lova, Liverpool chuan hnehna pawimawh tak an chang a, last 16 an inhlangkai ta a ni.

Hliamin a tibuai nasa em em chunga Ajax an hneh hi Liverpool manager Jurgen Klopp pawhin ropui a ti hle a. An tan hnehna pawimawh tak a nih thu a sawi a, an rawltharte an fak luam bawk. Liverpool chakna goal thuntu Curtis Jones kha kum 19 leh ni 306-a upa a ni a, Liverpool tan champions league-a goal thun thei naupan lama pathumna a ni a. Amah aia UCL-ah Reds tana goal thun thei naupang te chu David N’Gog (19 years and 252 days v PSV Eindhoven) leh Trent Alexander-Arnold (19 years and 10 days v Maribor) te an ni.

Liverpool hian Premier League lamah Wolves an hmachhawn hmasa zet ang a, kar leh nilai zan khian UCL group match hnuhnung berah tlachiang tawh FC Midtjylland hmachhawn turin Denmark-ah an zin ang. Ajax hian inkhel hautak tak an hmachhawn zui leh a ngai dawn a. Point khata an phak loh mek Atalanta nen last 16 luh an inchuh zui ang.

Group D-a inkhel dangah Anfield-ah ngei Liverpool meuh pawh hneh thei Atalanta chuan an khelh tawha la tlawm zat zat FC Midtjylland an mikhual a, point thum hmuh theihna hun remchang tha tak an neia ngaih a nih laiin an mualah a chesual a, chak zo lovin 1-1 in an inhnehtawk ringawt a, last 16 an lut ngei dawn em tih a chian theih loh phah leh zual.

Atalanta mualah Denmark club FC Midtjylland in bul an tan tha hle a, minute 13-na lekah Alexander Scholz chuan hmahruaina goal a thun. Mualneitu Atalanta hian hun rei tak chhung si an phur a, hun tawp dawn hnaih minute 79-naah Cristian Romero chuan goal thunin an si phurh sut ta nawlh a, an mualah ngei tlawm an pumpelh ta hram a ni. Atalanta hian pahnihna an la luah chhunzawm a, Ajax lakah an tlawm lo a nih chuan a zawnin UCL-ah last 16 an lut thei dawn a ni.

Group champion City
Premier League club lian, EPL-a an chet that loh laia Champions League-a chetha tak Manachester City chuan thawhleh zan khan khualmualah Portuguesse club lian FC Porto an hmachhawn a, goal awm lovin inhnehtawk mahse City tan group champion ni chiang turin point khat a tawk.

City tan hian hun tawp dawn hnaih lamah Gabriel Jesus chuan goal a thun zet a, a pawlte offside an lo awm vangin hnawl a ni ta thung. Khualmualah chak zo lo mahse City hian khelh 5 atangin point 13 an hmu a, pahnihna ni mek FC Porto nen an point hmuh zat la intluk thei bawk mahse Porto tan lehpelh theih an ni tawh lo thung a, chuvang chuan City hi group C-ah champion an ni chiang tawh a ni.

FC Porto hian English club an hneh hleithei lova, an hmachhawn hnuhnung vawi 6-ah chak an nei lo. Vawili tlawm zawkah an tang a, vawi hnih an inhnehtawk. FC Porto pawh hian last 16 an lut chiang ve tawh bawk a, an hnuaia awm pahnih; Olympiakos leh Marseille ten point thum ve ve chiah an la hmu a, macth khat chiah a awm tawh.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy