Liverpool tan point 3 a tawk

Pathianni zan khan English Premier League khelh chhunzawm a ni a. Leicester City lakah 1-0 a hnehna chang Liverpool in champion an hnaih leh zual a, Reds hian champion turin point thum chiah an mamawh tawh. Liverpool an chak rual hian Arsenal leh Chelsea ten hnehna an chang ve bawk. Team lian pathum an chak laiin Manchester United erawh chu Wolves hneh lovin an lo tlawm ve thung.
King Power Stadium-ah team pahnih dinhmun inang lo tak an inhmachhawn. La tlahniam rih lo tura chak mamawh tak chungin mualneitu Leicester City an inlan a. Champion hnaih leh zual tura point thum hmuh ngei tumin Liverpool an inlan ve thung. Mualneitu Leicester City hi tlakhniam hlau, thih tha tak zeta tan khawh an ni bawk a an mualah an tang rei thei hle. Foxes hian goal an thun hmasa hial nghe nghe a, mah se pawmsak an ni lo tlat thung. an goal thun hi pawmsak ni ta se inkhel result a danglam dawrh mai thei a ni.
Champion hnaih leh zual tura chak mamawh Liverpool hian goal thun ngei tumin an khingpuite an nawr a, hlauhawm pawh an siam ngun malh malh hle. EPL season kal meka top scorer ni mek Mohamed Salah luck zan a ni lova, hun tha a nei chungin Salah hian goal a thun thei tlat lo. Inkhel hmuhnawm takah goal lut a awm theih loh reng hnuin bench atanga lut Trent Alexander Arnold chuan minute 76-naah goal pawimawh tak a thun. Arnold goal thun hmangin Liverpool in hnehna an chang a, point thum pawimawh tak an hmu.
Foxes laka point thum an hmuh hmangin Liverpool hian champion an hnaih leh zual a. Champion turin point thum chiah an mamawh tawh a, nilai zanah Arsenal an tlawm a nih chuan khelh hah kher ngai lovin Reds hi an champion nghal nghal a. Arsenal in Crystal Palace an hneh a nih pawhin Liverpool hian Pathianni zana an mikhual Tottenham an hneh a nih chuan EPL champion thar an ni ang.
Liverpool in champion an hnaih leh zual sauh lai hian an muala tlawm Leicester City erawh chu EPL-ah an inhamtang zo ta lova, championship lamah an tlahniam ve thung.
UCL Khel tur Arsenal
Pathianni zana inkhel dangah Arsenal chuan mikhual an nihna hmunah 4-0 in Ipswich Town an hneh a, season tharah champions league khel turin an tling chiang nghal.
Champions League semi-final a PSG hmachhawn tur Arsenal hian tlahniam thei dinhmuna ding mek Ipswich Town an ngam hle a, Leandro Trossard goal hnih thun leh Gabriel Martinelli leh Ethan Nwaneri te goal khat ve ve thun hmangin Mimualah hnehna an chang a, point thum an hmuh belh. Ipswich Town an hneh leh tak vangin Arsenal hi EPL atanga champions league khel turin an tling chiang nghal.
Champions League khel tura Arsenal an tlin chian laiin Ipswich Town erawh chuan tlakhniam an hnaih ve telh telh thung. Ipswich hi 18-naah an awm mek a, an chung chiaha awm mek West Ham United nen point 15 zeta an inthlauh tawh vangin tlahniam ngei tura ngaih an ni.
Arsenal chak lai hian London club lian Chelsea pawhin mikhual an nihna hmun Craven Cotage-ah 2-1 in hnehna an chang a, Blues hi pangangaah an inhlangkai a, UCL khel phak thei dinhmunah an ding mek. Nottingham Forrest result a zirin paruknaa tlahniam thei reng an ni thung.
Pathianni zanah team lian dang ten hnehna an chan hlawm laiin Manchester United erawh chu an mikhual Wolves hneh lovin an tlawm ve thung a, 14-naah an awmzui a ngaih phah. Old Trafford-a lenglut Wolves tan hian Pablo Sarabia chuan minute 77-naah chakna goal a thun. Hmasawn tun thin mah se United hian EPL ah hma an sawn tak tak thei rih lo.