Daily Newspaper

LLTF/ VLTF TE VIL LEH KAIHHRUAI

45

-Thansiama
Khawbung

Tunhnai deuha Aizawl leh khaw thenkhata COVID-19 rawn hluar thar deuh chuan Aizawl hlauhna min neihtir hlawm a. Aizawla khawsa leh cheng tawh hrim hrim chu hmun dang ami ten kan hlau a ni ta ber.

Khaw tin leh veng tina VLTF ten thahnemngai takin khawtlang leh veng himna a nih beiseiin an thiam ang leh theih ang tawk zelin inkaihhruainate zamin dan an siam a. Awmze nei deuh leh nei em em lote pawh a awm ang.

Khaw thenkhatah chuan riak tur mikhual neih phal a ni lo a. Aizawl atanga haw hrim hrim chu VLTF ten ni 14 chhung anmahni leh an chenpuite home quarantine turin an ti a bawk a. Ni tin mamawh leh chakkhai bakah ei leh in, chawhmeh leh thil dangte lak luh leh thawn chhuah kawngah pawh khuahkhirhna siam a ni a. An khua lut tur reng reng an lo kalna khua VLTF-te lehkha phut te pawh an awm. Heng bakah hian dawr hawn hun bite siamin khawtlang huap dan tesep tam tak zam a ni bawk a. Khaw kar kawnga lirthei veivahna leh chetvelna te pawh engemaw chen chu a buai phah a ni.

VLTF ten hetiang hma an lak chhan hi hripui COVID laka khawtlang/ veng a him theihna a nih an rin vang a ni a. An thahnemngaihna a fakawmin a lawmawm takzet a ni.

Hetiang hi Champhai District kan nihphung chu a ni mek a. District dangah pawh hetiang thil thleng hi a awm nual ngeiin a rinawm. District thuneitu lam an inrawlh a, an hnuaia awm VLTF te awmze nei leh mumal zawka an kaihhruai a tul hlein a lang. VLTF in an thuneihna leh tih tur chin te, an mawhphurhna leh an hmalak dan tur te pawh hrilh thar fo a tha hle awm e. VLTF tan tak pawh tih tur chin leh hma lak dan tur a hriat leh zual ang a. Kal dan tur ber hre loa bangbo taka awm tan pawh rorel thiam a awlsam phah ngei ang.

Hlawh leh hamthatna engmah phut miah loa hah taka COVID dona ral hmatawnga tang LLTF/VLTF te hi a fel ber ber leh a hre ber ber an ni vek lo a. Sawrkarin dan a siam leh kaihhruaina a zamte pawh hre reng lo leh ngaih pawimawhna chang hre lote pawh awm theih a ni. Kaihruaitu leh thurawn petu, faka fuih phur fotu, an kal sual palh tur vengtu an mamawh em em reng.

India ram inawpna kalphungah thuneihna insemzai dan fel tak a awm a. COVID-19 avanga Lockdown/ Unlock Guidelines MHA-in a siamte kengkawhtu chu State leh UT sawrkarte an ni a. Chutianga Central sawrkar MHA-in Guidelines a siamte kalh leh do zawnga chet chu a rem lo a. MHA-in chutiang zawnga chetna a awm leh awm loh thlithlaiin beng a chhi reng thin.

State leh UT ten MHA-in Lockdown/Unlock Guidelines a siam hrulah inkaihhruaina an lo zam leh thin a. Chu chu kawng hrang hrangin kenkawh niin a kengkawhtu langsar tak chu LLTF/VLTF te hi an ni. An hna ber pawh anmahni rem hriatna leh thahnemngaih thila dan leh kaihhruaina siam aimahin state sawrkar leh an awmna DC ten kaihhruaina an siamte kenkawh leh a hlawhtlin theih nana theihtawpa tan lak a ni.

Central sawrkar-in State leh UT te a vil tlata an chetvelna a enthla ang tho hian State sawrkar pawhin VLTF te chet velna leh hnathawh, an thiltih dan engkim a enzui a, a vil hi thil nihphung tur pawh a nih hmel. Vengtu nei lo beram rual ang maia mahni duh ang anga kan tlat chuan danin awmzia a nei thei dawn lo a. Thil tha ti emaw kan intih lai hian dan palzutna leh mihring zahawmna inrahbehna thil hial pawh thleng palh thei a ni.

Lockdown puan angte phei chu Deputy Commissioner/ District Magistrate thuneihna niin a lang a. DC/DM hriatpuina pawh nise LLTF/VLTF te hi a puang theitu niin a lang lo. Mipui chetvelna leh ni tin mamawh leh bungrua chi hrang hrang chetvelna khuahkhirh thuah leh kawngpui dan chungchangah pawh DC hi thu tawp siama thu petu tur niawm tak chu a ni.

Mahni khaw bil leh veng bil te tea kan kal nat lutuk hian khawtual mi tan bakah khaw dangte tan harsatna a thlen thin a. Ram inawpna kawng hrang hrangah buaina a thlen chang a awm. Tin, mahni thuneihna piah lama chet hi a zahawm loh bakah dan hmaah pawh a him lo a ni.

Tunlai khawvelah khaw tin leh veng tin inmamawha inban tawn vek kan ni a. Mahnia khawsa thei kan awm lo. He hripui hian chuti maiin min kiansan pawh a rinawm bawk lo a. Tum teh mah ila a bil te tea inkharkhip leh inhungbing hi tuman kan tlin reng dawn chuang lo. Chuvangin rilru zau tak pua, kan tih tur chin leh sawrkar dan siamte pawh en pah zela him leh tha tho si kan duan hi a tul hle. Aizawl te, Lunglei te, Champhai te leh Dist.hqrs. dangte hian riaka mikhual neih phal lo vek mai se kan buai dawn em mai.

District thuneitute hian an district chhunga LLTF/VLTF te vil uluk leh zual se. An hmalaknate hriatpuiin an kal thiam lohnaah zirtirin kaihhruai se a va tha leh zual dawn em.

Duhthusamah phei chuan State sawrkarin guidelines a siamte duh tawk ta mai ila. Hemi kalh zawng hi chuan tualchhung leh veng bilin dan dang lo zam lo ila kan lungrual tlang berin a rinawm a. A tul ta a nih pawhin kan thuneihna huang chhungah zel chet nise. State sawrkar leh DC ten Guidelines an siamte hi kan mamawhna zawn leh kan mil tawka a siam a ni thin a. A tha tawk viauin a hriat. Heng an dam siamte pawh zawm hleithei loin a dang kan siam belh chiam zel hi tul loah buaina kan insiam mai mai ni te pawhin a lang e.

Eng chen nge he hripui chimawm tak COVID-19 hian min la tihbuai ang a, engtia rei nge kan la do zel dawn kan hre lo. Kum hnih thum lai pawh a ni thei. Kan innghahna ber tur hi LLTF/ VLTF te bak an awm chuang lo ang. Hun lo kal zel turah tun aia awmze nei leh zahawm zawka an chet a, dan hmaah an him zawk theih nan sawrkar lamin nasa leh zualin vilin kaihruai se a duhawm hle.

LLTFt/VLTF te zahna chibai kan buk a, thahnemngai leh fimkhur lehzuala kan ram him nana thawk zel turin duhsakna kan hlan e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy