Lo zawh hi khualzin tam zawk
hip thei tura ruahman kan tum
– Chief minister
Thingtlang lo zawh chu khualzin tam zawk hip thei tura agro tourism-a kalpui tumin an ruahman tih chief minister Lalduhoma chuan a sawi.
Association of Tour Operators Mizoram, Tourism department leh Agriculture department tangho chuan agro tourism chawikanna atana Thawhlehni khan Tualpui khaw lo zawhpui an buatsaih a. Hmanpuitu chief minister chuan, Tualpui chu pi leh pute atanga mi taima, hnathawh ngaisang khua, khaw dangten pur an chawkna niin, vawiin thlenga chhawmnun a la ni zel chu lawmawm a tih thu a sawi.
Sawrkarin kuthnathawktute a ngaisang a, a zah a, an kuthnathawh rah a lawmpui a, malsawmna dawng zel se a duhsak avangin sawrkar department buatsaiha lo zawhpui hman a ni chu lawmawm a tih thu a sawi a. Thingtlang lo neih chu bansan thut theih a ni loa, zawi zawia kalsan a nih theihnan sawrkarin hma a la mek zel tih a sawi a ni.
Tualpui leh Champhai inkar kawng hi Nesids Road project hnuaia laih tur a ni a, hei hian kan economy nasa takin a tih pui beisei tih chief minister hian a sawi.
“Lo zawh hi tourism anga kalpui a, khualzin tam zawk khaw dangah hip thei tura ruahhman a ni a. Tualpui khua in ramngaw a neih that vangin ‘model village’ atana thlan a ni a, a thawktu tur company nen inremna thuthlung peihfel thawkhat a ni tawh. Hei hian khualzin hip thei turin hmasawnna tam tak a keng tel dawn a, nasa taka cheibawl tur ruahmanna siam a ni. Khawtual mipui pawhin khualzinte dawngsang theia hawihhawm a, mite pan chak ni tur hmanlai thil hlui humhalh kawnga tan kan lak a tul a ni,” a ti.
Tualpui lo zawhpui hi minister Lalthansanga leh Dr Vanlalthlana bakah adviser to CM Lalmuanpuia Punte MLA-te pawhin an hmanpui a. Champhai North bialtu MLA Er H Ginzalala chu ‘lo zawh thlengtu’ a ni.
Lo zawh hi khualzin tam zawk hip thei tura ruahman kan tum – Chief minister
