Association of tour operators Mizoram (ATOM), tourism department leh agriculture department tangkawp ten agro tourism chawikan nan Tualpui ‘lo zawh pui’ an buatsaih a, hei hi chief minister Lalduhoma bakah, education minister Dr. Vanlalthlana; forest minister Lalthansanga; Lalmuanpuia Punte (adviser to CM) leh Champhai North bialtu MLA Er. H. Ginzalala ten an hmanpui a; Aizawl, Khawzawl leh Champhai atangin sorkar department officials thahnem tak leh party hruaitu engemawzat an tel bawk.
‘Lo zawh pui’ han tih hian, thingtlang loneih phunga hlo thlawh indawt dan (hnuhpui, hnuh hram, a thual, a thial, pawhchhiat)-a a hnuhnung ber ‘Pawhchhiat’ hi niin a lang a; hlo thlawh tur a awm tak tak tawh lo va, a hming lekin hlo an thlo ve a, intihhlimna chikhat ang a ni deuh ber.
Buh seng pawh la ni lo, eng zat nge buh a thar dawn tih pawh hriat thiam la har tak a nih lai a ni. He huna tel-te hi an hraw tlang hle mai a, heti zat sawrkar mi pawimawh hlo thlo tura an feh chhuak hi eng tianga ngaih tur nge tih hriatthiam a har hle. Heti taka hlo thlawh an ngai pawimawh a nih chuan, hlawk zawka buh thar chhuah thur thur dan tur pawh an veiin an ngaihtuah nasa hle turah han ngai chhin phawt ta ila.
Lo zawh pui hmanpuitu chief minister hian ‘thingtlang lo neih hi bansan thut theih a ni lo a, zawi zawia kalsan a nih theihna turin sorkarin ‘hma a la mek’ tiin a sawi a; hma lak a nih dan erawh sawi a ni lo.
Thingtlang lo neih kalsan kan tum mek laiin, agro tourism chawikan nan ‘lo zawh pui’ chu tawktarh bera neih tumin kan inbuatsaih sauh sauh lawi si a. Tourist-te hian an lo lawm phian ang a, ramngaw zau pui pui thiat zawnga thingtlang lo neih intihhmuh nan te hian kan hman phah leh roh si ang tih te pawh a hlauhawm rum rum mai.
Tunhmaa ram hruaituten, ‘kan rin pui ber buh hi thla hnih tla bak kan ram hian kan la tharchhuak thei lo’ an tih dum dum hnuah kum tam tak a liam leh tawh, eng hmasawnna nge kan neih le? ‘Hma kan la mek’ ti hian kum sawmnga dang hi kan inawi tlei leh mai dawn em ni ang?
Lo zawh pui…
