Sr. SP, Traffic, Aizawl chuan nimin July 22 atanga hman tan turin Aizawl khawpui chhung kawngpui dunga lirthei hmanga bungrua load leh unload khap hun a tichhuak a. He hriattirna hian Thawhtanni atanga Inrinni (ni ruk chhung) a huam a, lirthei heng— LMV, Pick-Up leh a aia lian a huam vek a, ni tin zing dar 8:30 – 11:00am inkar leh, chawhnu lamah dar 3:00 – 6:00pm inkar a huam dawn a ni. Hriattirna zawm lo chu Section 179 MV (Amendment) Act, 2019 hmanga hrem theih a ni.
Hetianga traffic lama thuneituten mipui harsatna sutkianna tur ngaihtuaha rilru an seng hi thil lawmawm tak a ni a. Tuna ruahmanna siam hi, chinchang hre zawk an nih avangin, mipui khawsak phung nena inrem thei tur ang bera an duan a nih ngei pawh a rinawm.
Hetih lai hian, zing dar 8:30 thleng load/unload phal a nih dawn avangin lirtheite hi zing dar 8:30 atangin an awmna hmun chhuahsanin kawngpui dunga lirthei dang zingah an inzep lut dawn tihna a ni a. Sikul kal hun leh sawrkar office kai hun bakah, office dawr turte chet chhuah hun, Aizawl khawpui chhunga lirthei tam zual hun (peak hours)-ah lirthei liante hi an hnawksak zualin, traffic flow tha lai pawh a tikhaihlak lehzual ngeiin a rinawm a, traffic a tawt zual sauh phah thei awm e. LMV/Pick-Up chin hi chu a la ziaawm thei ang a, motor lian chi a huam tel hian harsatna a tihnep phah lovang tih a hlauhawm hle a ni. Chawhnu lamah pawh tlai dar thum thleng bungrua load/unload phalsak an nih chuan dar 3 hnu lama traffic tawt belhchhahtu an ni leh thei chiah dawn tihna a ni bawk.
Hetih rual hian, bawlhhlawh paih motor-te hi, chhun lama traffic tawt kara an lo inrawlh ve thin avangin traffic hi a buai phah ve thin hle bawk a. Hei hi thuneitu leh khawtlang thawhhona tur a nih hmel a, tun aia hun vawng dik zawka bawlhhlawh paih motor tlantir te pawh hi traffic harsatna sutkianna tur a ni ve tho awm e.
Hei bakah hian, kawngpui sira lirthei dah tam lo tura hmalakna thar te hi awm thei se. Nileng lenga dawr kawta lirthei dahte hian kawng a tichep zual a, traffic harsatna sutkianna tur a nih dawn chuan parking fee lam hi chu khawpui chhung hmun bit zualah te hi chuan it loh mai ni se, traffic harsatna sutkian kan duh tak tak chuan a chân zawnga kan kal ngam ve te hi a ngai a nih ber awm hi maw!
Load leh unload phal loh hun hi…
