Hand Holding Policy’ hnuaia thalaite eizawnna kawng dapsaknaah loan ngaihtuah pui thlengin a awm dawn tih ZPM leader Lalduhoma chuan a sawi.
Lunglei West bial a fannaah ZPM leader chuan vantlang inkhawmah ‘Hand Holding Policy’ hnuaiah bul tanna hlawhtlinpui tham, mi hlawhtling tur thlangin an kalpui dawn a, trade thlan tur tam tak a awm thei dawn tih a sawi. “A market a tha em tih te, a hlawhtlinpui dawn em, tih thlengin ngun takin department mithiamte kan enpui anga, thalaite tan eizawnna tur kawng tam tak siamsak kan tum a; loan thlengin ngaihtuahpui dan kan dap dawn. Tribal tan leh hmeichhe tan bik hemi kawngah hian hmalakna tur a inhawng a, loan lak hi a vaiin rulh a ngai dawn loa, margin money lak te a nih dawn bakah central-in loan a rulh then sakna tur kawng thlenga ngaihtuah a ni a; he hmalakna tur project hi State Bank of India hotute atangin ruahman sak thei tur an awm a ni,” a ti.
Opinion poll lakah a pumpuiah ZPM chu pakhatna an ni tih Lalduhoma hian a sawi a. Hei hian kan ram politics dinhmun a tilang nia sawiin, “MNF leh Congress hun a liam mek a, chu chu mipui hmuh dan a ni. Pathianin a hunlaia a ruat hi rahbeh theih a ni loa, MNF leh Congress hi Pathianin mal a lo sawm tawh a, vawiinah ZPM hun a lo inher chhuak ve mek niin a lang,” a ti.
Lunglei West bial mipui tan an tlangdung kawngpui chu state highway-a puan ni se, mipui eizawnna leh kawng hrang hrang bakah Aizawl panna thlengin a awlsam dawn tih ZPM leader hian a sawi a. Pathian zarah thil titheia an awm a, sum dinhmunin a zir chuan state highway-ah an puang dawn tih a sawi.
Loan ngaihtuah pui dan kan dap dawn – Lalduhoma
