Sawrkar chuan lockdown kalpui leh ngawt ai chuan inthlahdah loa mitinte hri laka him tura inzirtir lam kalpui a duh tih Covid-19 Medical Operational Team chairman Dr ZR Thiamsanga chuan a sawi.
Covid hrileng mekah Aizawl Municipal huamchhung emaw state pum emawa lockdown neih leh chu sawrkarin a rawt a rinawm chiah tawh loh tia The Aizawl Post zawhna chhangin, “Veng/khua huap lockdown emaw containment zone puan emaw a nih loh chuan a puma lockdown puan rup rup ang kha chu tih a rinawm rih loh,” a ti.
Sawrkar ngaihdanah chuan tuna hri darh dan chu vantlanga darh huk – community spread-ah ngaih ala ni lo tih a sawi a. “Kan la in chhui (contact tracing) thei zel a, random sample lakah pawh a negative a tam zawk. Community spread thleng loin kan la inveng theiah kan inngai,” a ti.
Hetihrual hian fimkhur hle erawh a ngai tih Dr ZR Thiamsanga hian sawiin, “Community spread hi kan hlat tawh lo thei a, chumi laka inven nan chuan kan bul vel amite hi hri kaiah ngai vek mai ila, he hri nena cheng dun chungin hri kan kai loh nan inthlahdah a thiang lo a ni,” a ti.
Kum upa lam leh naupangte bakah, natna benvawn neisate pawn chhuah tam loh bakah, mipuiten hmai tuam, social distancing, kut sil uluk leh he hri kai lohna tura sawrkarin tih tur a tihte zawmthat chu kan damdawi tha ber a ni tih Covid Medical Operational Team chairman hian a sawi.
(THE AIZAWL POST – Tualchhung)
Full>> ePaper Subscribe
