Daily Newspaper

Lockdown chhungin hri inkaichhawn khaidiat chhutchah hman tum

10

Tun lockdown kalpui mek chhung hian Aizawl Municipal huamchhunga hri inkaichhawnna khaidiat chu chhutchah hman tum a ni tih sawrkar chuan an sawi.

Thawhtannia Health & Family Welfare minister Dr R Lalthangliana hoa sawrkar official thukhawm chuan, tun lockdown chhung hian Covid-19 inkaichhawnna khaidiat (transmission chain) chhutchah hman beisei a nih thu an sawi a. Hemi atan hian Contact Tracing Team, Sample Collecting Team leh ZMC laboratory-a thawktuten chhunzan zawma an thawh sawi a ni. Hetihrual hian hri kai tharte an chhuichiannaah case tam ber chu, fimkhurna kawnga mipui kan inthlahdul deuh vang nia a lan thu sawi a ni.

Hri kai zinga an taksaa natna langchhuak lo (asymptomatic) te chungchangah, an chenna hmunhma leh an khawsak dinhmunin a tlin a, khawtlang hruaituten rem an tih bawk chuan, an in lama inenkawl ‘home isolation’ kalpui a tha zawk em, tih sawi ho a ni a. Uluk taka zirchian a nih hnuah rawtna siam a, ngaihtuah leh atan tih a ni.

Hei bakah hian Covid-19 leng kaihhnawihah kum tlinglo (kum 18 hnuailam) tana inkaihhruaina (SOP) siam a nih thu leh sawrkar pawmpuina dil mek a nih thu sawi a ni a. ‘SOP for Vulnerable People’ pawh duan mek a nih thu sawi a ni bawk.

Private hospital-a TrueNAT khawl buna sample test tir chungchang leh Rapid Antigen Test hmanga private hospital-a in test chungchang pawh sawrkarin a ngaihtuah mek a nih thu te; Covid-19 testing strategy siamthat a tul thu leh testing facility tihchangtlun a tul thute sawi a ni.

Covid kaite enkawlna – Covid Care Centre-a hnawmhnawk (bio-medical waste leh general waste) senghawia tihral dan tur pawh ngaihtuah a ni a. Sawrkar laipui atanga inkaihhruaina dan an siam tha tak tak awm mahse, Mizoram dinhmun thlirin state tana tha ber turin ruahmanna siam nise an ti a; heng hnawmhnawkte hi phum bo (deep burial) zel dan tur ruahmanna siam tum a ni.

Thutkhawmah hian Mizoram district hrang hranga Covid Care Centre (CCC) dinhmun tarlan a ni a. Aizawl district-ah CCC 18 awmin khum 1042 dah theihna a ni a. Civilian 882 awm theihna CCC leh para-military force 160 awm theihna a ni. Aizawl district, a bikin Aizawl khawpui leh a chhehvelah CCC mamawh belhna a san avangin sawrkarin kawng hrang hrangin hma a la a, tunhnaiah mi 480 awm theihna tur BSUP building Durtlang leh mi 80 enkawlna tur Women’s Polytechnic Hostel old building, Durtlang chu a hmunah kalin endik a ni a, a tul anga hma lak chhunzawm tum a ni. Kohhran leh YMA ten an hmunhmate CCC atana hman an phal thu dawn a ni mek zel chu lawmawm an tih thu an sawi a; heng hmunhmate CCC atana hman tura a him tawk leh tawk loh endik a ni ang. Mizoram University hotuten an hmunhma thenkhat CCC atana hman an remtih thu dawn niin, vawiin hian endik tum a ni.

Tun dinhmunah Mizoram pumah CCC atana hman mek leh hman tura pawm 35 awmin, a ruala Covid-19 positive 1722 enkawl theihna tura hisap a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy