Daily Newspaper

Lockdown hnu thlarukah India in Covid-19 tuar nasa zel

11

A tira 500 atangin 57 lakh-ah a kai tawh a. Rampum huap lockdown hnu thlarukah Covid-19 chuan India ram hmun tin a fang chhuak tawh a, test leh vaccine siam lamah hmalakna kalpui nasat a ni chungin eng hunah nge hrileng chu thunun a nih tur Scientists ten an hre lo.

March 24 khan Prime Minister Narendra Modi sorkar chuan rampum ni 21 lockdown a puang a, chu chu hripui inkaichhawn danchah nan tih a ni. Khatih lai khan SAR-CoV-2 virus chu mi 500 vel lekin kaiin nunna chan 12 chauh an la awm.

Thlaruka ral meuh chuan India chu US tihloha khawvela Covid-19 kai tamna ber ni tawhin 57.32 lakh kai an awm tawh a, nunna chan 91,149 an awm tawh bawk.

Covid-19 len laiin mimawl ber te pawhin titi bera an neih chu RT-PCR test leh man tlawm mah se rintlak lem lo rapid antigen tests chungchangte a ni tawh a. US-a awm ecpidemist leh economist Ramanan Laxminarayan chuan pandemic darh laiin epidemic inthukru a leng a awm reng, a ti bawk.
Covid-19 chuan India hmun tin a fang chhuak tawh a, thingtlang lam pawh thleng vek tawhin test chaklohna leh tlemna apiangah a nasa lo angin a lang mai mai a ti.

RT-PCR test nasa takin nei ila chuan UP leh Bihar angah chuan nasa takin virus kai an pung ang. Tunah chuan healthsystem chaklohna hmunah epidemic hi a inthukru mai mai a ni tiin Center for Disease Dynamics, Economics & Policy chuan a sawi.

Inkaichhawn muang zawkin a kal mek a, mipui te inveng fimkhur lo phei se chuan nasa viau tur a ni a, thunun a la ni lo hrim hrim tiin Laxminarayan chuan a sawi bawk a.

Mahse, tun atanga thla hnih thumah virus inkaichhawn chu population immunity a awm hnaih dawn avangin a tlem tial tial tura a ngaih thu sawiin a chhan ber pawh mipui thahnem tak kaia damchhuak leh an awm tawh a, chung mi te chuan virus an putdarh tawh dawn loh vang a ni a ti bawk.

Sorkar leh mimal tin tena fimkhur taka thil an kalpui avangin tuna hrileng mek san hnuah hian a tlakhniam tial tial a rinthu Laxminarayan chuan a sawi bawk.

March 23-a prime minister-in lockdown a pun hma ni hnihah khan India in sample 18,383 a test chauh a, September 22 ah chuan 6,62,79,462 RT-PCR leh rapid antigen test a kalpui hman tawh a. Recovery pawh 46 lakh chuang an ni tawh a, 81.55 per cent thachhuak an ni.

Immunologist Satyajit Rath chuan fimkhur ngaih thu sawiin India chuan community tin inkaichhawn nasat theih hun lai a la tawn mek thu a sawi thung a.

Khawvel huapa zin veivah tamna hmun atanga inkaichhawn zel chu khawpuia mipui chen bitnaah nasain tunah chuan ram pum a fang chhuak tawh a ni, tiin Rath, National Institute of Immunology (NII) a thawk chuan a sawi a. India ramah inkaichhawn thunun a la ni lo hrim hrim tiin a sawi bawk.

A tir lama lockdown kalpui nat khan nasa zawka inkaichhawn tur chu a veng ngei a. Mahse, ‘thunun’ chu a ni thei lo hrim hrim a. Hei vang hian hun eng emaw ti chhung chu inkaichhawn hi a la nasa reng dawn tiin Rath chuan a sawi bawk.

Immunologist Vineeta Bal chuan India sorkar chuan khawvel hmun dang atanga zir lovin hun rei tak chhung lockdown a kalpui tawp mai a ni tiin a sawisel bawk a. Hruaitute hian mirethei te dinhmun an hre tak tak lova, an ngaihsak bawk lo tiin Pune-a Indian Institute of Science, Education and Research a thawk Bal chuan chuan a sawi.

Hun rei tak chhung public health infrastructure kan ngaihthah avangin epidemic hmachhawn turin kan nep em em mai a ni, chuvang chu a nia lockdown kha kalpui a nihna chhan tiin Bal chuan a sawi bawk.

India ramah vaccine siam mek pariat a awm a, heng te hian phase 2 trial an kal mek a. Kumin kum tawp hian vaccine hmasa ber neih hman theih a ni a, mahse, engtia rei nge a ven ang a, a hnathawh dan tur pawh chiang lo tak a la ni bawk.

India rama Covid-19 leng mek chu mipui nawlpuiin an la kaibelh zel turah an ngai bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy