Daily Newspaper

LOCKDOWN LEH PRIVATE INSTITUTION

10

-B. Lalremruati (Marty Boitlung)

Hla siamtu / phuahtuin “Naktukah
eng nge thleng dawn, a chin hria tunge awm le” a tih ang deuhin kan hma hun lo thleng tur hriat lawk hi a har si a, chutiangin tuna min tibuai em emtu hripui Covid19 hian khawvel a tuam dawn tih tunge hre lawk bik ang. In ralrinna dar vuak anih hnuah pawh kan heti ta tho anih hi maw. Covid19 hian harsatna hrang hrang a thlen satliah a ni mai lova, nunna tam tak a suat a, sorkar lu a hai a, tampui mitthi tawrh hlauhawm khawpin kan awm ti tih ta anih ber hi.

Amaherawhchu thil thleng zawng zawng hi a chhe vek tihna a ni lova, keini Zofate pawh a tha lama min nghawngna a awm ve tho a, chung zinga tlemte chauh han tarlang ila. Pathian Biak In kan khara mahse keimahni in lum ngei chu chhungkuaa Pathian biak nan kan hmang a, a va ropui em! Pawn chhuah mumal theih loh zarah kut hnathawhah kan thangharh a, chuktuah huan siam te, ei leh in siam tui zir te, puanthui te leh a rem rem thawh mawp mawp mai te. A va han tha tehlul em! Tin, kan tu leh faten an nitin zirna in an pan theih loh a zarah an zirtirtute zirtir tur chauha kan lo dah thin kan fa hrinte ngei kha keimahni ngeiin lehkha kan zirtirin an zirlai kan enpui a, hei hian hlut rukna riau a nei a ni. Heng bakah hian hripui dona kawngah hian mitin kan thawkho thain kan inlungrual ti ila kan sawi sual tam ka ring lo.

Awle, heng zawng zawng karah hian Private Institution te dinhmun i lo thlir lawk teh ang. Private Institution te hi Fees a intungnungte an ni tlangpui a, an fee tlingkhawm hi thawktu rawihna man te, building luah man te leh thil hrang hrang atana hman a ni a, an tan sum lakluhna dang a awm meuhin a lang lo. Heti anih avang hian sorkar pawhin an harsatna tawh mek hi a hriatthiampui em em a, chuvangin kan tun dinhmunah 50% fee lak a remtihpui a, hei hi Institution lamin an harsat lutukna eng emaw chen an zangkhaipui nan leh zirlai naupang leh chhungte tan pawha ritsak lutuk lova kan awm tlan theih nana ruahman a nih angin a tha tawk viauin a lang.

Fee chungchang hi tlem han sawifiah zual deuh hlek ila. Kum 1 (Session 1) an zir chhung fee hi Zoramah chuan a samkhai leh zangkhai zawk nan ni maw, thlabiin pek a ni tlangpui a, chu chu Monthly Fee tia kan hriatlar hi a ni a, a nihna takah chuan session fees a ni. State dangah te chuan quarterly emaw, half yearly te emaw in an pe tlangpui deuh thin. Chutiang zelin an session fees atanga thlabia semdarha an chawitur kha a zatve 50% tun dinhmunah chuan zirlai ten an chawi tihna a ni. Hetih rual hian Zirna In hawn mumal theih a nih loh avangin Net Banking te leh a remchan dan anga fee pek chhoh tan zel a ni a, amaherawhchu fee la pe reng reng lo hi zirlai naupang leh chhungteah eng emaw zat an awm reng tho a, rilru ngiaunger deuh pu lui talha ‘An kal loh fee kan pek nachhan tur a awm lo’ ti tlat pawl te, fee pek tlem tum rana admission ti mai duh lo pawl te pawh awm zel a ni.

Hripui avang hian kan harsa tlang tih tuman kan hai lova, sorkar lu pawh a hai a ni a, mimal indapchawp tan phei chuan lu hi a hai satliah lovin a na bur thei ang tih a hriat a ni. Mahse, ringtu in ti, Christian inti te tan chuan rilru tha leh tluang tak put hun niin ka lo hre ve mai mai a. Harsatna kan tawn hi inhriatthiam tlanna neih te, inhmangaih tlante hi a Christian nun em em a, chuvangin mitin hian rilru tluang leh tha mitin chungah put hram hram tum ila, zirna bikah pawh kan harsa ngawih ngawih anih chuan kan tu leh fate zirtirtu leh hotute hnenah kan harsatna te tha takin sawi ila fee chawi lui talh tur hian min ti kherin a rinawm loh. Hetih rual hian a thei te erawh chuan fee pek hi kan mawhphurhna a ni tih hria ila pek hram hram tum bawk ila a duhawm hle mai. Hemi chungchang hi social media lamah tawngkam feikibara inchhun sawk sawkna ka chhiar ve ta nual mai a, a thalo ka ti em em a, hetia in tih vak vak ai chuan kan tih tur chin theuh ti ila, rilru tluang tak put hram hram tum ila chu chu kan tu leh fate lo la thanglian zel tur tan pawh a thain a rinawm zawk. Kan Bible chuan mihring damchhung hi kum 70 a ni a, chakna avangin kum 80 a ti a, keini nu leh pa, pi leh pute hi Bible in a sawi damchhung kum zatve hmang tawh kan ni deuh furin a rinawm a chuvangin kan nun chawhnu lamah hian tuktin par aia mawi zawk lawmnaa khat rilru thianghlim hi put hram hram tum lui tlat ila, keimahni ngei pawhin kan hlimpui zawk ngei ang.

Pathian zarah kan dam anga kan tu leh fate pawhin an zirna mumal taka an chhunzawm leh theih ngei beisei ila, chutih hunah chuan an pawl sang emaw an la pawl hniam deuh emaw an zirtirtuten theihtawp chhuahin mumal takin an zirna an lo kalpui leh in an lo zirtir leh theih ngei beisei ila, tin, keini zirlai naupang chhungte pawhin kan mawhphurhna pakhat fee pek hi tih ve ngei zel tum bawk ila, thawhhona tha neih tum ila, inpumkhatna tha siam ila chumi hlawkna teltu tur chu kan fate, zirlaite ngei hi an ni si a. Kan tu leh fate hi ngaihsan tur dik kan kawhhmuh thiam pawh a tha hle mai. Nitina anmahni finna leh hriatzauna kawnga an zirtirtute hi an ngaihsan hmasak ber tur zing ami ni vein ka hria a, chutih rual chuan zirtirtute pawh ngaihsantlak ngeia awm a ngai bawk. Zirtir hna hi Lal Isua hnung zuina a ni a, Lal Isua pawh kha zirtirtu a ni si a.

Online teaching chungchang tlem han sawi leh lawk ila. Zokhaw lam unaute chu ka sawi sak thei lova, mahse khawpui lam bik lo thlir ta ila. Online teaching te hi chu ram changkangah chuan an lo kalpui reng reng fo a ni a, keiniin kan hmelhriat tharlam deuh a ni a chuvangin a thenin kan faka a thenin kan sel a. Engkim hian thatna leh that lohna kawng hi a nei thei a, amaherawhchu tun dinhmuna kan tu leh fate zirna kawng awm thei chhun ni a lang chu online teaching hi a ni a, a tha thawkhat viau nia a lan laiin thenkhat tan buaithlakna lai a awm ve leh thei tho mai. He online teaching hi a thatna kawng chu kan tu leh fate hian kan tun dinhmun hi holiday mai mai a ni lova, zirlai an ni a, harsatna hripui avanga zirna in kal thei lo mai an ni a, lehkha zir hi an tan a pawimawhin a tul a ni tih an hriat nan a tha em em a, amaherawhchu smart phone tha te leh internet pack nei thei mumal lo kan awm anih chuan a buaithlak ve leh thei tho mai. Mahse chhungkaw tinah hian kan chhungkaw member zinga pakhat chuan smart phone kan hum deuh vek tawhin a rinawm a, chuvangin kan tu leh fate zirtirtuten tha leh tul an tih anga online teaching an kalpui hi kan phak leh theih ang tawkin lo thlawp ve thei hram hram ila a duhawm khawp mai. Online teaching kalpui ve lem lo Zirna In an awm anih pawhin sel lem lo ila, Zirna In an hawn hunah theihtawp chhuahin an lo zirtir turah beisei mai ila. Smart phone tha tak tak hum thei ten kan smart phone neih that te hi social media a active em em nan mai mai a hmang lovin kan fate tan hmang tangkai ila, ‘Kan smart phone kan fate tana kan hman tangkai kum’ te ti ila a tha phian ang. Keipawh ka phone hi Rs.3500 man chauh a ni a mahse ka fate assignment hi a hun takah ka submit sak ve thei zela, online registration tih tul te pawh hi ka ti ve thei zel ania. Thil reng reng hi rilru thianghlim tak pua kan hmachhawn chuan buaina tam tak pawh hi kan pumpelh theiin a rinawm fo.

Engpawh nise, he hripui Covid19 lakah hian lo him ula, lo hlim ula, ram tan, kan tu leh fate tan, an zirna atan, an hlawhtlinna atan thawk ho dial dial ila, kan phak leh theih tawk chinah sorkar thlawp zel ila, Zoram hmasawn leh Zoram nuam i siam ila, lungrualna zion tlangah kan Zoram hi i siam ang u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy