Lok Sabha MP inthlanah mi paruk din hmel

April ni 19-ah Mizoramin Lok Saba MP tur a thlang dawn a, he inthlan lo awm turah hian candidate paruk vel an awm dawn a nih hmel.
Party hrang hrangin mahniin candidate an nei dawn a, tuna a lan danah chuan political party-teah thawhpui nei an awm dawn lo.
ZPM-in an candidate tur an puang tawh a, anni hnu-ah hian PC party-in an puang ve leh. Ningani hian Congress party-in an candidate tur puan an tum a, MNF-in Zirtawpni-a puan theih an tum bawk. BJP-in tun kar chhunga puan theih an inbeisei. Party pangate’n candidate an nei theuh ang a, independent ticket-a din tum pakhat a awm bawk.
Congress party-in Nilaini khan candidate tur an tifel a, a tuka puan nghal an tum. Nilaini chhunah khan search committee te’n an party candidate tur hi an thlang fel tih thu dawn a ni.
MNF party-in an candidate tur an thlang fel thawkhat tawh a, Zirtawpni-a puan hman tumin, tihfel thuai an tum tih thu dawn a ni.
BJP pawhin tun kara puan hman an beisei a, mahse Delhi lam ngaichang an nih avangin, chiang fak chuan an sawi thei rih lo.
Thu dawn danin, BJP hian an party candidate ni thei turin mi paruk vel an chhawp a, an hming leh chanchinte Delhi-a an party hruaitute hnenah thawnin, chu chu an nghak a ni.
Mizoram inthlanpui hnuhnung bera candidate nei AAP lamin Lok Sabha inthlan chungchangah thawm an la nei lo.
Party pangate’n candidate an nei theuh dawn tih a chiang tawh a, independent ticket-a din tum an awm bawk; tun hnaia Congress party atanga chhuak Hriata Chhangte-in din a tum nia hriat a ni.
PC party candidate tur hi hmeichhia a ni a, MNF, Congress leh BJP candidate turte hi mipa ni tura rin a ni. ZPM candidate tur pawh mipa a ni a, hmeichhe candidate pakhat a awm dawn a nih hmel.