Site icon The Aizawl Post

Lokayukta thuamtha turin sawrkar ngen

Lokayukta thuamtha turin sawrkar ngen
Chak zawka Mizoram Lokayukta-in hna a thawh theihna’n thuamtha turin sawrkar an ngen tih Mizo Zirlai Pawl chuan an sawi.
MZP hruaituten Mizoram Lokayukta chairman C Lalsawta IAS (Rtd.) hmu in, eiruk dona tura din Mizoram Lokayukta dinhmun leh a kalhmang an zawtfiah a. Tun dinhmunah beisei a phak lo nasa a, danin a sawi angin an case dawnte chhuitu tur Enquiry Wing an neih loh avangin harsatna lian tak an tawk a, loh theih loha Mizoram sawrkar agency – Anti Corruption Bureau a hman avangin, duh angin an hnu chhui kawngah an chak lo nia an hriat thu an sawi. A rang thei ang bera Enquiry Wing din turin sawrkar an ngen tih an sawi a ni.
‘Lokayukta-ah hian thawktu indaih lohna a nasa hle a, Act-in thawktu mi 93 awm tura a tih laiin tunah hian mi 42 chiah an awm a. indaih lohna hi mi 49 a ni. Tuna thawktu tam ber pawh department dang ami deputation-a pawh chawp leh contract basis deuh vek an ni a. Thawktu thenkhat phei chuan hna tha zawk hmuh avangin an bansan fo tih hriat a ni. Tuna Lokayukta awmdanah hian eirukna do tak tak tura beisei chi niin a lang loa, ngaihsak an tul takzet a ni,’ MZP chuan a ti.
Mizoram sawrkarin Lokayukta dan siamthat a tum mek nia hriat a nih thu leh, he dan hi siamthat a nih pawhin a nih tur anga kalpui an duh tih sawiin, ‘Mite ber atanga chief minister thlenga chhui thei tur leh, eiruknaa inhnamhnawh tu pawh hremna pe thei tura thuamchak kan phut a ni,’ a ti bawk.

Exit mobile version