Pathianni zan khan London in NBA a thleng a, Memphis Grizzlies leh Orlando Magic te an inkhel. Kum 2019 hnu lama London in NBA regular season a thlen lehna hmasa berah hian Grizzlies chuan point 126-109 in Magic an hneh.
O2 Arena a mipui thahnem tak pungkhawm hmaah Memphis Grizzlies in Orlando Magic lakah bul an tan tha viau a, quarter hmasa berah point 40 lai an thawkchhuak a, point 17 laiin an chungnung nghal. Bul tan chhe mah se quarter hnihnaah Magic an insiamtha a, inkhel hmuhnawm nawk an lantir. Quarter hnihnaah hian point hnihin Grizzlies an chungnung hram a, point 19 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, quarter thumnaah point 28 ve ve thawkchhuakin chungnung zawk an awm thei lo hial. Quarter thumnaah chungnung zawk an awm theih loh hnuin quarter linaah point hnihin Magic an chungnung ve ta nge nge. Quarter hnuhnung berah chungnung zawk ni bawk mah se Magic hian point 17 in Grizzlies an umphak lova, London khawpuiah an tlawm. Orlando Magic laka an chak tum hian Memphis Grizzlies tan hliam damkawr Ja Morant chuan point 24 a thawkchhuak a, ball sawhlet vawi nga a dawn bakah vawi 13 zet assist a nei tling bawk.
Kum 2019 hnu lamah a vawi khat nan London in NBA Regular seson a thleng ve leh ta hian ngaihhlut a hlawh hle a, ticket 18,424 zet hralhchhuah a ni. Memphis Grizzlies leh Orlando Magic te inkhel hi a hmunah milar thahnem takin an en a. Footballer lar Virgil van Dijk leh Declan Rice te hmuh tur an awm a. Formula 1 driver Kimi Antonelli bakah actress Rosamund Pike a langsar viau bawk.
Europe-a khawpui hrang hrangin Basketball a inelna lian leh sum tamna ber NBA regular season an thleng zauh zauh dawn. Kum 2027-ah Manchester-ah game khat khelh a ni ang a. Paris in January 2027-ah inkhel pakhat a thleng ang a. 2028-ah Paris leh Berlin in game khat ve ve an thleng ve leh dawn bawk.
NBA chuan football ropuina Europe khawmualah Basketball vawrhlar leh zual an tum a. Kum 2027-28 chhungin European League an buatsaih dawn. Europe-ah hian Basketball inelna lian EuroLeague a lo awm sa tawh thin a, EuroLeague aia changtlun leh lian zawkin NBA in league siam thar an tum mek a. Buaina lian tawk lovin tihhlawhtlin theih ngei an inbeisei.
London ah Grizzlies an chak
