London Marathon hnehtu Kiptum leh Hassan

London Marathon hnehtu Kiptum leh Hassan
Pathianni khan London Marathon 2023 an tlan a, mipa lamah Kenya daihrei Kelvin Kiptum a chak ber a, Dutch Olympic track champion Sifan Hassan chu a marathon debut-ah women’s race hnehtu a ni ve bawk.
Kum 23 mi Kiptum hian men’s London Marathon hnehna a chan rualin a chipui Eliud Kipchoge course record lo siam tawh chu minute khat leh second 12-in a hmakhalh a, darkar hnih leh minute 25 chhunga tlankawng zawh zoin Kipchoge world record lo siam tawh kha second 16 lekin a khum zui ta bawk.
London tualcharah hian Kenyan tlanchakte bawk an langsar leh a, darkar hnih leh minute 25 chhunga tlankawng zawh zo Kelvin Kiptum hnung chiaha pahnihna luahtu pawh a chipui Geoffrey Kamworor niin, ani nen hian minute thum laiin an inthlau.
London Marathon-a a inlan tawpberna ni taah Britain chhuanvawr Mo Farah chuan pakuana luah pha chauh tawhin, Olympic champion tum li ngawt ni tawh Farah hi kum 40 a tling ve ta a, a ropuina thin London Marathon-ah a hnung ta viau a, kumin September thla intlansiakpui Great North Run an tihah hian a chhuak leh zet ang a, a marathon career a zialfel ve tawh dawn a ni.
Farah hian Pathianni intlansiak tan hma daih tawh khan tun hi a London race hnuhnungber tur a nih thu mittui parawl teuh chung a lo sawilawk tawh a, “Kum tam tak chhung chu London hi ka tan a lo ropui tawh thin a, he hmunah ngei hian min thlawp tlattute hnenah lawmthu ka sawi a ni.
“Keimah lamah chuan tah vak maite hi ka chak a, he khaw mipuite hi an mak a ni tawp. Ruahsur hnuaiah pawh kawtthlerah an intlar zui a, anni hi ka career-a hei leh chen min nawrkaltute an ni,” tiin London Marathon-a a hun hnuhnungah amah thlawptute lam hawiin lawmthu a sawi.
Mipa title changtu Kiptum-a lamah kirleh ila, nikum December thla mai khan he Kenyan hian Valencia khawpuiah marathon debut-a hun hmang rei lo ber record lo siam tawhin, darkar hnih, minute khat leh second 53 chhungin tlankawng a zo a, history-ah chak ber pathumna a luah nghal.
London kawtthlerah Spain ram aiin a chak zual leh sauh a, Ethiopian reigning world champion Tamirat Tola lakah minute thum leh second 34 zetin a chungnung a, Tola hian pathumna a luah pha chauh.
Kum 25 mi Emile Cairess chuan a marathon debut-ah parukna a hauh pha a; he Briton hian darkar hnih, minute riat leh second sarih chhunga tlan thlengin, British mipa zinga marathon intlansiaka chak ber pathumna a ni pha a, Farah leh Steve Jones chiah tluk loh neiin, London race bikah phei chuan Briton mipa zinga thleng hmasa pahnihna a ni.
Top 10-ah British runner pali an tling a, Farah leh Cairess tih loh midang pahnihte chu pariatna Phil Sesemann leh 10-na Chris Thompson-te an ni.
Hmeichhe race ve thung
Women’s field-ah hian he marathon-a runner ropui ber ber an fuankhawm hnem ber tum niin, Kenyan world record holder Brigid Kosgei chu tlan tan atanga minute thumna lekah a tlan chhunzawm thei loin a tawp a; hetih lai hian Ethiopian defending champion Yalemzerf Yehualaw pawh panganaah thleng pha chauhin, ‘London hi ka drem a ni’ titu Dutch star Sifan Hassan chuan marathon intlansiak a hmachhawn vawikhatnaah hnehna a chang nawlh!
Khel bawr nuam lo chunga tlan Hassan hian Ethiopian tlan thei Alemu Megertu hmakhalhin, Megertu hi pahnihnaah a thleng a; tunhma lama unbeaten Olympic champion lo ni tawh Kenya nula Peres Jepchirchir chu pathumnaah a thleng thung.
Kum 2021 Tokyo Olympics 5,000m leh 10,000m intlansiaka gold medal awrh ve ve thei khawpa hming lo chher tawh kum 30 mi Hassan chuan BBC Sport kaltlangin khawvel a hmachhawn zui nghal a, “Ka khel bawr na avang khan ka chawl hman hial a, mahse, intlanzal tumin bul ka tan leh a, drinks station pakhat chu ka kalpel a; Ramadan (Muslim-te chawnghei hun) lai a nih avangin chawte ka nghei a, chu chuan tan a phet deuh lo thei lo.
“Km 20 kan tlan thlen khan ka chau lo tih ka hria a, ka tawp dan tur lamah buai loin tlan thlen hrim hrim ka duh a ni.
“London hi ka dream ni reng thin a ni a, tunah chu mumang ram chu ka dai ta reng mai a, ka tlanchhuak zo ang em tih pawh ka chian ngam loh laiin ka hun tawn hi a mak a ni. Ka nuna ka nun chhung chuan hringnunah he hun hi ka theihnghilh ngai tawh lo ang,” a ti.
Kum 27 mi British hmeichhia Sam Harrison chuan darkar 2:25:59 chhung hun hmangin 11-na a luah a, amah rau raua marathon tlanna’na hun a hman rei loh ber tum a nih piahlamah he intlansiaka British hmeichhe zinga tlanchak pangana a ni pha bawk.
Wheelchair title
Switzerland runner kum 37 mi Marcel Hug chuan London Marathon-a men’s wheelchair title panga hlawhchhuak tling turin darkar khat, minute 23 leh second 48 hun a hmang a; London Marathon men’s wheelchair race-a vawithum a chakzawnna a ni.
Netherlands mi Jetze Plat chu pahnihna niin, pathumnaah Japanese Tomoki Suzuki a thleng thung.
Britain runner kum 43 mi David Weir chuan London Marathon tum 24 a hmachhawnnaah pangana a hauh ve bawk.
Australia mi Madison de Rozario chuan Manuela Schar of Switzerland hmakhalhin a career-a a vawihnihna atan women’s wheelchair title a hlawhchhuak ve bawk.
London Marathon 2023-ah hian runner 48,000 chuang inlanin, London khawpui huh chuap hnuaiah mipui sang tam takin kawtthlera intlarin runner-te an lo tiphur a; charity-ah pound maktaduai chuang an hmuchhuak nghal bawk.
Covid-19 hripui avang khan he marathon hi a hun pangngaiah an tlan thei lo reng a, kumin erawh hripui len hnua a vawikhatna atan kumkhaw tlaitluana an calendar hman thin zulzuiin April thlaah ngei an huaihawt leh thei ta a ni.