Daily Newspaper

Loneitu ten lungawilohna lantir zual zel dawn

6

Farmers union inzawmkhawm Samyukt Kisan Morcha (SKM) leader te chuan agriculture marketing law pathum te nuaibo a nih theih nana an nawrna chu nasa zawka kalpui tumin chung zingah chuan lungawilohna lantirna hmuna chaw nghei te pawh a tel a, rorel lai National Democratic Alliance a tel te biak an tum bawk.

Delhi-Haryana border Singhu a lungawilohna an lantirna hmunah SKM leader te chuan December 26 leh 27 ah NDA leader te chu an hmuh tur thu leh BJP te chu dan pathum te nuaibo tura nawr tura an ngiat tur thu an sawi a ni.

“NDA leader te hnenah kalin kan lungawilohna lantirna min thlawp turin kan ngen dawn a. Min chhanna chu mipui hriatah kan sawi lang ang” tiin Bharatiya Kisan Union president Rakesh Tikait chuan a sawi a. SKM leader te chuan NDA constituents te chuan an thlawp lo a nih chuan an thlawp zui loh tur thu an sawi nghal bawk.

Swaraj India president Yogendra Yadav chuan loneitu hruaitute chuan nimin atang khan chaw nghei inchhawk an kalpui thu sawi bawkin, “Hruaitu 11 ten darkar 24 chhung chaw an nghei phawt ang a. Ram chhung hmun hrang hranga awm te leh lungawilohna lantirtute pawh hunger strike ti ve turin kan ngen a ni,” tiin Yadav chuan a sawi a. Hei bakah hian Haryana sorkar chu loneitu tena Haryana-Rajasthan ramria lungawilohna an lantirna thlen tir phal lovah a puh bawk.

SKM chuan December 23 Kisan Divas-ah India mipuite chu loneitute an thlawpzia lantir nana chaw tum khat nghei turin an ngen bawk a. Hei bakah han December 27-a Prime Minister Narendra Modi-a’n radio thusawina a neih ‘Mann Ki Baat’ ah lungawilohna lantir nana an chaw thleng te khawng ri turin an ngen bawk a. December 26 leh 27 ah ram danga Indians awm te pawh rally nei turin an ngen bawk.

Krantikari Kisan Union president Darshan Pal chuan sorkar chuan ram dang atanga an lungawilohna lantira an thlawpzia lantir nana pawisa thawntute pawisa thawn chuan Foreign Contribution (regulation) Act hmangin a khap tia sawiin demawm a tih thu a sawi bawk a. Hei bakah hian arthiyas (commission agents) leh loneitute dap thut sorkarin a kalpui chu an dem thu sawiin Punjab-ah chuan Income Tax office pawnah lungawilohna lantir tur a nih thu a sawi bawk.

All-India Kisan Sangarsh Co-ordination Committee (AIKSCC) te chuan lungawilohna lantirna hmunah mipui tam zawkin an zawm zel thu sawiin Punjab leh Haryana a lungawilohna zawmtu tam zelin Shahjahpur leh Ghazipur ah te pawh an pun zel thu an sawi bawk a.

Hei bakah hian loneitu pawl te chuan Central Trade Unions (CTUs) leh independent National Federations leh Associations te hnenah an lungawilohna thlawp tura an ngen thu a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy