Daily Newspaper

Loneituten Sorkar nena inbiak hne tawh

9

Central Minister te nena darkar li chuang sawihona Delhi border-a ni sawm lungawilohna an lantirna chiaha an neih hnuah loneitu hruaitute chuan dawhtheihna an neih tawh loh thu sawiin sawihona neih belh an duh tawh lo va, minute 25 silent protest an kalpui thung.

Placard ‘Yes or NO?’ tih kengin sorkar chu farm law pathum a kalpui te chu a hnukdawk dawn nge dawn lo sawi chiang turin an phut a ni.

Agriculture Minister Narendra Singh Tomar chuan hun tam zawk an la mamawh thu sawiin sorkar pawhin inrawnkhawmna neiin rawtna siam an duh thu a sawi a. Inbiakna neih leh hun atan loneitu tena Bharat Bandh huaihawt an tum tuk December 9 rawt a ni bawk.

A hmain Prime Minister Narendra Modi chuan Home leh Defence Ministers te nen Tomar leh Food and Railways Minister Piyush Goyal te nena sawihona an nei a. Mahse, engmah rawtna thar emaw an siam lo thung.

Loneitu hruaitute chuan sorkarin Vigyan Bhavan eitur a chhawpsak te chu ei duh lovin hmun dang atangin eitur an la thung bawk.

Hetihlai hian Haryana, Uttar Pradesh, Mashy Pradesh atangin loneitu sang tam tak te hi Delhi-ah an zawm zui veleh bawk a.

Agriculture Minister Tomar chuan sorkar chuan loneitute thlai thar chu MSP-a leisak zel a tiam thu sawiin State Mandis te tihchangtlun a nih tur thu a sawi a. “Sorkar chuan heng dan kaihhnawiha loneitute duhlohte ngaihthlak a inpeih reng a. Loneitute hnen atangin rawtna fiah taka siam turin kan ngen a, kan hmu si lo a ni,” tiin a sawi.

Mahse, loneitu aiawh Kavitha Kuruganti chuang, “Sorkarin eng clause nge paiha belh tur min zawt reng a. Dan siamtha turin kan lokal lo tih kan sawi chiang reng a. Kan duh chu heng dan te hi hnawl veka a ngai anga kal a ni,” tiin a sawi.

Sorkar nena inbiakna neih hi kan kham a, ngawi renga minute 25 awm kan thlang a. An inrawn khawm vel laiin kan file cover ah ‘Yes or No’ tih ziakin kan keng lang a ni, tiin Krantikari Kisan Union president Darshan Pal chuan a sawi bawk.

Tomar chuan inbiakna neih zui leh a ngaih thu sawiin Centre chuan inbiakna neih duhin December 7 a rawt a, mahse, loneitute chuan December 9-ah an ti thung a ni. December 8-ah Bharat Bandh kalpui a ni dawn a. Trade Union leh National Truckers’ Federation ten an thlawp dawn bawk a. Ram pum huapa lungawilohna kalpui bakah Delhi luh leh chhuah dan a ni dawn bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy