LPG-ah chiai lo turin India-in mipui chah, ren turin ti bawk

LPG-ah chiai lo turin India-in mipui chah, ren turin ti bawk
Khawvela liquefied petroleum gas (LPG) la lut tam ber pahnihna, India chuan ram chhunga mamawh phuhrukna tura a beih mek laiin consumer-te chu chiai lo turin a ngen a, a theih chen chenah energy ren turin a ngen bawk.
Sorkar laipui chuan emergency power hmangin thlifimtute chu a theih anga tam LPG siam chhuak turin thu a pe a, LPG connection nei chhungkaw maktaduai 333 velin an tlakchham loh nan industry-a hralh tihtlem a ni bawk.
Sorkar thupek hian tual chhunga LPG siam chhuah chu 25%-in a tipung tih union oil ministry-a Joint Secretary Sujata Sharma-i’n a sawi.
Tlakchham lohna tura hmalakna hrang hrang kalpui ni mek mah se thingpui dawr, khualbuk leh ⁠industry te chuan ei in siam nana hman ber, LPG an lak theih zat tihtlem a nih avangin harsatna an tawk tan mek.
Sharma-i chuan, “Chiai taka LPG cylinder hauh (book) leh inchuh chiam chiam awm hi thu dik lo avanga lo awm a ni,” a ti.
US leh Israel-in Iran an beih avangin Gulf leh Strait of Hormuz khar a nih avangin khawvel puma a phurhna buain India-in tuialhthei thlitfim loh, LPG leh Liquefied natural gas (LNG) a chawk luh a buai phah hle.
India hian nikum khan ei rawngbawlna gas metric ton maktaduai 33.15 a hmang a, a mamawh 60% vel hi ram dang atanga a lak luh a ni a. A lak luh zinga 90% vel chu Middle East atanga a lak a ni bawk.
Ni khata cubic meter maktaduai 190 (mscmd) a hman zinga a zahve vel chu a lak luh tihna a ni.
Sharma-i chuan LNG a lak luh thin 47.4 mmscmd chu a leina ber, Qatar-in a thawn chhuah a tihkhawtlai avang leh leina tura an inremna awm sa force majeure hmanga a tihtawp avangin buai tih a sawi a. Gas hi a pawimawh lo zawk deuhte hnen atangin a hmangtu pawimawh hnenah a pe ta zawk tih a sawi.
India hian tuialhthei thlitfim loh leh LNG hi hmun dang atangin a la mek a, LNG cargo pahnih phurin chu pan mek niin Sharma-i hian a sawi.
Washington-in ni 30 chhung Russian atanga lei a phal lohna a tihtawp lailawk hnuah Indian thlifimtute chuan tuipui kaltlangin Russia tuialhthei barrel maktaduai tam tak an lei.
“Middle East buaina hian khawvel tan harsatna a siam a, India erawh chuan a tuialhthei mamawh a nei mek zel a. Sorkar chuan thil thlengte a ngaihven zui a, tuialhthei inpekna tihtawp a nih loh nan leh chhungkaw leh a pawimawh bikte tan a tul angin hma a la mek a ni,” a ti bawk.